ԵՐԵՎԱՆ, 2 հուլիսի — Sputnik. Հայաստանի զինված ուժերի գլխավոր շտաբի պետ, գեներալ-մայոր Արտակ Դավթյանը կոչ է անում բնակչությանը և ԶԼՄ-ներին հաղորդել բանակում ծառայությունից խուսափելու ցանկացած փորձի մասին։ Այս մասին Դավթյանն ասաց լրագրողներից հետ զրույցում` մեկնաբանելով այն հարցը, թե արդյո՞ք բանակ կզորակոչվի գործարար, «Բարգավաճ Հայաստան» կուսակցության առաջնորդ Գագիկ Ծառուկյանի որդին։
Ինչպես նշեց Դավթյանը, եթե օրենքի խախտումներ լինեն, ապա համապատասխան կառույցներն օպերատիվ կարձագանքեն։ Եթե տարկետման համար հիմքեր լինեն, ապա այդ մասին պատշաճ կարգով կհաղորդեն։
«Այդ հարցը (Ծառուկյանի որդու զորակոչվելու մասին` խմբ.) դուք պետք է հասցեագրեք ոչ թե ինձ, այլ զորակոչի հանձնաժողովին։ Օրենքի շրջանակում այս կամ այն դեպքի վերաբերյալ որոշումն ընդունում է հանձնաժողովը, ոչ թե գլխավոր շտաբի պետը։ Եթե որոշվի, որ նա չի գնալու բանակ, ապա մենք կներկայացնենք իրավական հիմքերը», — ասաց Դավթյանը։
Sputnik Արմենիայի տեղեկություններով` օլիգարխի որդին` Նվեր Ծառուկյանը, բանակից տարկետում չի ստանա։ Մենք փորձեցինք տեղեկություն ստանալ Կոտայքի զինվորական կոմիսարիատից, որտեղից պետք է զորակոչվի Ծառուկյան կրտսերը, բայց մեր զանգերին չպատասխանեցին։
Ավելի վաղ ԶԼՄ-ները հաղորդել էին, որ Ծառուկյանը դիմել է սպորտի և երիտասարդության հարցերի նախարարություն` կոչ անելով որդու` Նվեր Ծառուկյանի անունը ջնջել ծառայությունից տարկետում ստանալու ցուցակից։
Նախարարությունն առաջարկել էր բազկամարտը ներառել այն մարզաձևերի ցուցակում, որոնց ներկայացուցիչները բանակից տարկետման իրավունք են ստանում։
Ըստ մամուլի `Նվեր Ծառուկյանին բանակից ազատելու մասին լուրը հրապարակվելուց հետո վարչապետ Նիկոլ Փաշինյանն իր մոտ է հրավիրել սպորտի և երիտասարդության հարցերի նախարար Լևոն Վահրադյանին և նրան շատ հանգամանալից բացատրել, որ այդ պաշտոնը իրեն տրված չէ իր հովանավորների որդիներին բանակից ազատելու միջնորդություններ գրելու համար: Փաշինյանը ասել է, որ եթե իր որդին կամավոր մեկնում է Արցախ ծառայության, ապա ինքը չի հանդուրժելու, որ մյուս պաշտոնյաների և օլիգարխների որդիները օգտվեն ինչ-որ սողանցքերից և ազատվեն ծառայությունից: