ԵՐԵՎԱՆ, 1 հուլիսի — Sputnik. Երևանի հարավային շրջաններում վթարի պատճառով ջուրն անջատել են։ Ջրամատակարարումը կվերսկսվի հուլիսի 1-ին ժամը 18։30-ին, Sputnik Արմենիային ասաց Հայաստանի ջրամատակարարման օպերատոր Veolia Ջուր ընկերության մամուլի քարտուղար Մուրադ Սարգսյանը։
Ջուրն անջատել են Արարատի պոմպակայանում եղած վթարի պատճառով. Շենգավիթ և Էրեբունի շրջաններին ջուրն այստեղից է մատակարարվում։
Անցած տարվանից Երևանը գրեթե ամբողջությամբ ստանում է լեռների ջուր։ Բայց Արարատի պոմպերը պահեստային են այն դեպքերի համար, եթե ամռանն ինքնահոսը բոլորին չբավականացնի։
«Սովորաբար այդպես է լինում հուլիսի կեսից մինչև օգոստոսի կեսերը։ Բայց այս անգամ շոգերն ավելի շուտ եկան, ուստի պոմպակայանը սովորականից շուտ է գործարկվել», — ասաց Սարգսյանը։
Ջուրն անջատել են Շենգավիթի շրջանում և մասամբ Էրեբունիում։ Նշենք, որ վերջին օրերին Երևանում պահպանվում է մինչև 40 աստիճան ջերմաստիճան։