ԵՐԵՎԱՆ, 29 հունիսի — Sputnik. Հայաստանում աղիքային վարակների ակտիվացումը սեզոնային գործոնով է պայմանավորված։ Դիզենտերիայի և այլ վարակների տարածվածությունը նախորդ տարվա մակարդակում է, թեև Երևանում որոշակի աճ է նկատվում։ Այս մասին Sputnik Արմենիա ռադիոկայանի եթերում ասաց ՀՀ առողջապահության նախարարության «Հիվանդությունների վերահսկման և կանխարգելման ազգային կենտրոնի» հատուկ վտանգավոր և օդակաթիլային վարակների բաժնի պետ Լիանա Թորոսյանը։
Հայաստանի բնակիչները մտահոգություն են հայտնում, թե վարակը հնարավոր է պայմանավորված լինի ոչ որակյալ ջրի օգտագործմամբ: Այս մտահոգությունները անհիմն են, այդ են փաստում նաև լաբորատոր հետազոտությունների արդյունքները:
Մասնագետն ընդգծեց, որ բնակչությանը մատակարարվող խմելու ջրի որակի և անվտանգության նկատմամբ մշտապես իրականացվում է դիտարկում, որի արդյունքում Երևանում հունիս ամսվա ընթացքում հետազոտված խմելու ջրի լաբորատոր նմուշներում որևէ շեղում չի արձանագրվել։
Թորոսյանը կարևորեց սննդի գործոնը։
«Չմոռանանք, որ աղիքային վարակի տարածմանը նպաստում է նաև սննդի գործոնը։ Ամառային ամիսներին սննդամթերքը կարող է նպաստել աղիքային վարակների ակտիվացմանը։ Պացիենտների լաբորատոր անալիզները վկայում են, որ վարակները սննդային բնույթ ունեն», — ասաց առողջապահության նախարարության ներկայացուցիչը։
Նա նշեց, որ սննդի սխալ պատրաստումը կամ պահպանումը կարող է աղիքային վարակներ առաջացնել, հատկապես` երեխաների մոտ։
Թորոսյանն ընդգծեց, որ առավել խոցելի են երեխաները, այդ պատճառով աղիքային վարակների ակտիվությունը նկատվում է մինչև 7 տարեկան երեխաների մոտ։
Ընդհանուր առմամբ աղիքային վարակներով հիվանդների 80-85% հենց երեխաներն են։
Թորոսյանն ընդգծեց, որ հիմա հիվանդանոցներում շատ երեխաներ կան, բայց խուճապի պատճառ չկա։
«Երբ ասում եմ «շատ», պետք է հասկանալ, որ այդ երևույթը նկատվում է ամեն տարի ամռանը։ Երեխաների շարքում ծանր կամ ծայրահեղ ծանր հիվանդներ չկան։ 3-4 օրից նրանց դրական դինամիկայով դուրս են գրում հիվանդանոցներից», — ասաց նա։
Առողջապահության նախարարության ներկայացուցիչն ասաց, որ պետք է տարրական կանոնների հետևել` սեփական, ինչպես նաև երեխաների անվտանգությունն ապահովելու համար։
Մասնագետը խորհուրդ է տալիս սնունդը փոքր չափաբաժիններով պատրաստել, պահել բացառապես սառնարանում։ Հետևել երեխաների ճաշացանկին, լցնովի պաղպաղակ չգնել, խուսափել փողոցում վաճառվող, այսպես կոչված, թարմ հյութերից։
Ինչ վերաբերում է հասարակական սննդի կետերին ու մանկապարտեզներին, ապա Թորոսյանը նշեց, որ սննդամթերքի անվտանգության ստուգումը առողջապահության նախարարության իրավասության մեջ չէ։