ԵՐԵՎԱՆ, 28 հունիսի — Sputnik. Այսօր կառավարության նիստից առաջ լրագրողները Հատուկ քննչական ծառայության պետ Սասուն Խաչատրյանից փորձեցին ճշտել` թե արդյո՞ք Մանվել Գրիգորյանի կնոջ` Նազիկ Ամիրյանին կալանավորելու միջնորդություն կներկայացվի դատարան։ «Այս պահին հստակ չեմ կարող ասել, դա կախված է նախաքննության ընթացքում Նազիկ Ամիրյանի հետագա վարքագծից»,–ասաց Խաչատրյանը` նշելով, որ պետք չէ առաջ ընկնել, Նազիկ Ամիրյանը դեռևս կասկածյալի կարգավիճակ ունի։ «72 ժամվա ընթացքում պարզ կլինի ամեն ինչ»,- հավելեց ՀՔԾ պետը։
Հիշեցնենք, որ Նազիկ Ամիրյանին ձերբակալելու որոշումը մի քանի օր առաջ էր կայացվել, բայց ոստիկանությունը չէր կարողանում հայտնաբերել նրան։ Սակայն երեկ` հունիսի 27-ին, Նազիկ Ամիրյանը անձամբ է ներկայացել նախաքննական մարմին:
Նազիկ Ամիրյանը կասկածվում է ՀՀ Քրեական օրենսգրքի 235-րդ հոդվածի 2-րդ մասով նախատեսված հանցավոր արարքի կատարման մեջ. ըստ մեղադրանքի՝ նա անհայտ աղբյուրից ապօրինի կերպով ձեռք է բերել ու Մանվել Գրիգորյանի հետ իրենց հաշվառման և փաստացի բնակության հասցեում՝ Էջմիածին քաղաքի Ալավերդյան փողոցի 46 տանն ու հանգստի գոտի ծառայող Արմավիրի մարզի Արշալույս գյուղի Լճափնյա 28-րդ եւ 30-րդ վարչական շենքերում ու հարակից տարածքներում ապօրինի կերպով պահել մեծ քանակությամբ զենք և զինամթերք:
Նախաքննությունը շարունակվում է: