ԵՐԵՎԱՆ, 27 հունիսի — Sputnik. Ավարտվել է Քոբուլեթի շրջանցիկ ճանապարհի երկրորդ հատվածի շինարարությունը։ Այդ մասին հաղորդում է Sputnik Գրուզիան` հղում անելով երկրի ենթակառուցվածքի և տարածաշրջանային զարգացման նախարարությանը։
Նախագիծն իրագործվել է ամառային զբոսաշրջային սեզոնին ընդառաջ, նշվում է հաղորդագրության մեջ։ Ճանապարհի 18–կիլոմետրանոց հատվածում, որն արդեն շահագործման է հանձնվել, ընդամենը 2 թունել և 15 կամուրջ կա։ Դրանց շարքում է նաև Վրաստանի ամենաերկար կամուրջը (1,18 կմ), որը կառուցել են Սաչինո գյուղի մոտ։
«Այդ ճանապարհը թույլ է տալիս ավելացնել տարանցիկ հոսքը և առնվազն 30 րոպեով կրճատել Թբիլիսիից Բաթում տանող ճանապարհը», – ճանապարհի բացման արարողության ժամանակ ասել է Վրաստանի վարչապետ Մամուկա Բախտաձեն։
Կառավարությանը ղեկավարը նշել է, որ նոր ճանապարհը կկրճատի ճանապարհածախսը և շրջակա միջավայրի վրա վնասակար ազդեցությունը։
Կարևոր է, որ Աջարիան զբոսաշրջային սեզոնը դիմավորում է ավելի զարգացած ենթակառուցվածքով և այն պատրաստ է ավելի շատ հյուրեր ընդունել, նշեց Բախտաձեն։
«Մեզ համար շատ կարևոր է, որ այս ճանապարհի օգնությամբ շատ գյուղեր կարող են կապվել կենտրոնական մայրուղիների հետ։ Դա զարգացման լրացուցիչ նախադրյալ է։ Ծովափնյա գոտուց բացի կարևոր է յուրացնել Աջարիայի զբոսաշրջային պոտենցիալը հատկապես բարձր լեռնային շրջանում», – նշել է վարչապետը։
Նշենք, որ Քոբուլեթի շրջանցիկ ճանապարհի առաջին հատվածը կառուցվել է 2014թ–ին։ Առաջին և երկրորդ հատվածների ընդհանուր երկարությունը կազմում է 31,7 կմ, ինչը թույլ կտա ամբողջությամբ քչացնել Քոբուլեթի առափնյա գոտու ծանրաբեռնվածությունը տարանցիկ շարժումից։
Նախագիծը ֆինանսավորել է Զարգացման ասիական բանկը։ Արժեքը կազմել է մոտ 85 միլիոն դոլար։