ԵՐԵՎԱՆ, 27 հունիսի — Sputnik. Ոստիկանության Նոր Նորքի բաժնի քրեական հետախուզության բաժանմունքի ծառայողները որոնում են «Լեննականցի Ջեյմս» մականվամբ քաղաքացուն: Այս մասին հայտնում shamshyan.com-ը։
Երեկ՝ հունիսի 26-ին, ոստիկանության Նոր Նորքի բաժին է դիմել Երևանի բնակիչ, 46-ամյա Գ. Մ.-ն և հայտնել, որ օրեր առաջ «Լեննականցի Ջեյմսը» նրա հետ պայմանավորվածություն է ձեռք բերել, որ իր ծանոթը Վրաստանից Mercedes պետք է գնի, սակայն ինչ-ինչ պատճառներով դա չի ստացվել, որից հետո հունիսի 20-ին, կեսգիշերն անց «Լեննականցի Ջեյմսը» իր ընկերների հետ այցելել են Գ. Մ.-ի՝ Արաբկիր վարչական տարածքում վարձակալական հիմունքներով իր բնակության վայր և զենքի սպառնալիքի տակ իրեն տանից դուրս են տարել, նստեցրել KIA մակնիշի ավտոմեքենան և տարել Երևանի Վազգեն Սարգսյանի անվան ռազմական ինստիտուտի հարևանությամբ գտնվող ինչ-որ շինության տարածք և այնտեղ 2 օր առանց հաց ու ջրի պահել:
Ընթացքում պահանջել են, որ նա իրենց պետք է վճարի 2 հազար դոլար:
Գ. Մ.-ի խոսքով` հոգեբանական ճնշման տակ ինքը համաձայնվել է, որ այդ գումարը մի քանի օրվա ընթացքում կմուծի, որից հետո Ջեյմսն ու նրա ընկերները բաց են թողել: Արդեն հունիսի 24-ին Երևանում նա Ջեյմսին է փոխանցել 1000 ԱՄՆ դոլար, խոստանալով, որ մնացածը կվճարի 2 օրվա ընթացքում:
Փաստի առթիվ ոստիկանության Նոր Նորքի բաժնի հետաքննչական բաժանմունքում նյութեր են նախապատրաստվում:
Ձեռնարկվում են անհրաժեշտ օպերատիվ-հետախուզական միջոցառումներ՝ «Լենինականցի Ջեյմսին» և նրա ընկերների ինքնությունը պարզելու և հայտնաբերելու ուղղությամբ: