ԵՐԵՎԱՆ, 25 հունիսի — Sputnik. Նիկոլ Փաշինյանը պատասխանեց, որ այս շաբաթ քննարկումներ կլինեն, որպեսզի հասկանալի լինեն, թե ինչ քայլեր են պետք փոքր և միջին բիզնեսի վիճակը բարելավելու և այն պաշտպանելու համար:
«Տարբեր առաջարկներ կան, հետաքրքիր գաղափարներ, բայց հիմա չեմ խոսի դրանց մասին, որովհետև այս շաբաթվա քննարկման ընթացքում պիտի լսեմ փորձագետների և մասնագետների խորհուրդները»,–նշեց ՀՀ վարչապետը։
Նա շեշտեց, որ փոքր և միջին բիզնեսի, աշխատավոր մարդկանց շահերը պաշտպանելուն այլընտրանք չկա:
«Հասկանում եմ, որ մարդիկ ավելի արագ են ուզում արդյունքներ տեսնել: Բայց որոշ բաներ արվել են, օրինակ՝ մեր խնդրանքով որոշ տոնավաճառներ իջեցրել են վարձավճարները: Նաև մաքսային մարմինների հետ ենք աշխատում, որ փոքր և միջին բիզնեսի համար ավելի լավ պայամններ ապահովենք»,–նշեց վարչապետը։
Նա ավելացրեց, որ իր թիմը հետևողականորեն զբաղվելու է հարցով, ՓՄՁ-ներին չեն նեղացնի, ամեն բան կարվի, որ բիզնեսի այդ հատվածը զարգանա: