ԵՐԵՎԱՆ, 25 հունիսի — Sputnik. Ազգային անվտանգության ծառայությունը բերման է ենթարկել ՀՀ պետական պահպանության ծառայության պետի նախկին առաջին տեղակալ Վաչագան Ղազարյանին: Լուրը Sputnik Արմենիային հայտնեց ՀՀ ԱԱԾ մամուլի կենտրոնի պետ Սամսոն Գալստյանը:
«Կա նման բան, ես հաստատում եմ այդ տեղեկատվությունը: Ավելի ուշ հանդես կգանք հաղորդագրությամբ»,- ասաց Գալստյանը:
Նշենք, որ հունիսի 20-ին Վաչե Ղազարյանին պատկանող «Յանս» ռեստորանային համալիրում խուզարկություն է իրականացվել, որից հետո քրեական գործ է հարուցվել հայտարարագրերում կեղծ տվյալներ ներկայացնելու կամ հայտարարագրման ենթակա տվյալը թաքցնելու, ապօրինի հարստանալու դեպքերի առթիվ։
Սերժ Սարգսյանի թիկնազորի պետ Վաչե Ղազարյանն իր հայտարարագրերում չի նշել միլիոններն ու թանկարժեք իրերը, այն դեպքում, որ բարձրաստիճան պաշտոնյաները, «Հանրային ծառայության մասին» Հայաստանի Հանրապետության օրենքի համաձայն, պարտավոր են օրենքով նախատեսված կարգով բարձրաստիճան պաշտոնատար անձանց էթիկայի հանձնաժողով ներկայացնել գույքի, եկամուտների հայտարարագրեր:
Վաչիկ Ղազարյանը համարվում է ՀՀ երրորդ նախագահի ամենահավատարիմ մարդկանցից մեկը։ Ղազարյանն այդ պաշտոնից ազատվել է մայիսի 21-ին։