ԵՐԵՎԱՆ, 23 հունիսի — Sputnik. Հայաստանի ֆուտբոլի ֆեդերացիան կրկին տուգանել է «Շիրակ» ֆուտբոլային ակումբին, այս անգամ` 1 միլիոն 419 հազար դրամով։
Այս մասին հայտնել են հունիսի 22–ին կայացած Հայաստանի ֆուտբոլի ֆեդերացիայի կարգապահական կոմիտեի հերթական նիստի ընթացքում, տեղեկացնում է ՀՖՖ պաշտոնական կայք էջը:
«Շիրակ» ՖԱ-ն 30 օրվա ընթացքում իր նկատմամբ կիրառված տուգանքը չմուծելու համար է տուգանվել:
««Շիրակ ՖԱ» ակումբի` տուգանքը 30 օրվա ընթացքում չմուծելու համար, ՀՖՖ-ի կարգապահական կանոնագրքի 15-րդ հոդվածի 33-րդ կետի համաձայն` «Շիրակ ՖԱ» ակումբին տուգանել 1419000 դրամ»,–նշված է կարգապահական կոմիտեի 9–րդ կետում։
Հիշեցնենք` ՀՖՖ-ն դադարեցրել էր Շիրակ» ֆուտբոլային ակումբի անդամությունը ֆեդերացիային, իսկ վերջինս հրաժարվել է մասնակցել Հայաստանի Բարձրագույն խմբի հաջորդ առաջնությանը։