«Իմ ֆինանսական միջոցները, մուտքերն ու ելքերը նշված են իմ հայտարարագրում» . Շարմազանով

ԱԺ փոխնախագահ Էդուարդ Շարմազանովը պարզաբանում է տվել Զարուհի Փոստանջյանի «բացահայտման» վերաբերյալ։
Sputnik

ԵՐԵՎԱՆ, 22 հունիսի — Sputnik.  ԱԺ նախագահի տեղակալ, ՀՀԿ խոսնակ Էդուարդ Շարմազանովը, որն այս պահին գտնվում է Ալբանիայում` Սևծովյան տնտեսական համագործակցության խորհրդարանական վեհաժողովի ՍԾՏՀ ԽՎ) 51-րդ լիագումար նստաշրջանի աշխատանքներին մասնակցելու նպատակով, հաղորդագրություն է տարածել, որով մեկնաբանում է Երևանի Ավագանու անդամ Զարուհի Փոստանջյանի «բացահայտումը»` պատգամավորի կառուցվող տան վերաբերյալ։

Զոհրաբ Մնացականյանը Մինսկում շփվել է Էլմար Մամեդյարովի հետ

«Տեղեկացա, որ Զարուհի Փոստանջյանը ֆեյսբուքյան եթերում ցուցադրել է իմ կիսակառույց շինությունը և հայտարարել, որ այն «կառուցվում է հանրային միջոցների՝ ժողովրդից թալանված փողերի հաշվին»: Այս կիսակառույց շինությունը, այո, պատկանում է ինձ, և դրա վերաբերյալ Զարուհի Փոստանջյանի հայտարարությունը բացահայտում չէ»,– նշել է նա:

Շարմազանովն ընդգծել է, որ բազմաթիվ առիթներով ոչ թե որևէ մեկի հայտարարությանն արձագանքելով, այլ իր հարցազրույցներում խոսել է այդ մասին:

«Երբևէ չեմ թաքցրել, որ արդեն 8-րդ տարին է` կառուցում եմ այդ շինությունը, որն ավարտին հասցնելու համար դեռ տարիներ կպահանջվեն: Իմ ֆինանսական միջոցները, մուտքերն ու ելքերը, նշված շինության կառուցապատման նպատակով վերցված երկարաժամկետ վարկը, ինչպես նաև նշված կիսակառույց շինությունը նշված են իմ հայտարարագրում, որը բաց է եղել և հասանելի ցանկացած քաղաքացու համար: Մշտապես հայտարարել եմ, այժմ էլ ամենայն պատասխանատվությամբ հայտարարում եմ՝ ես բաց եմ օրենքով սահմանված ստուգումների համար»,– ասել է ՀՀԿ խոսնակը:

Շարմազանովի խոսքով` 10 տարի ծառայել է և շարունակում է ծառայել Հայաստանի Հանրապետությանը՝ պետական պաշտոնը համարելով առաքելություն:

«Երբևիցե ուղիղ կամ միջնորդավորված պետական գնումների որևէ գործընթացի չեմ մասնակցել, որևէ ապրանքի ներկրման և արտահանման գործարքում նույնիսկ միջնորդավորված չեմ եղել: Եթե կապացուցվի, որ ես երբևէ անգամ 1 լումա գիտակցված կամ անփութորեն մսխել եմ հանրային միջոցներից, պետական բյուջեից, երբևէ մասնակցություն եմ ունեցել որևէ անօրինական գործարքի կամ եղել եմ որեւէ կոռուպցիոն սխեմայում, պատրաստ եմ կրել օրենքով սահմանված ամենախիստ պատիժը»,– շեշտել է նա:

Շարմազանովը պաշտոնապես հայտարարել է, որ այսուհետ եթե որևէ մեկը փորձի արատավորել նրա անունը և մոդայիկ դարձած ժողովրդահաճո անվանարկումներով էժան հեղինակություն ձեռք բերել զրպարտությամբ, պաշտպանելու է պատիվը դատարանում:

«Սթափվեք, տիկնայք եւ պարոնայք, ձեր անպատժելիության ժամկետը սպառվել է»,– եզրափակել է նա։

Տեղեկացնենք, որ Զարուհի Փոստանջյանն իր ֆեյսբուքյան էջում հրապարակել է մի հոլովակ, որտեղ մատնացույց է անում, իր մեկնաբանությամբ, այն պետական պաշտոնյաների առանձնատները, որոնք այդ շինությունները կառուցել են «հանրային միջոցների» հաշվին։