Շարմազանովը վստահեցնում է, որ ինքը երբեք որևէ կոռուպցիոն սխեմայի մեջ չի եղել և պետական փողերից ոչ մի դրամ չի յուրացրել։
«Եթե հիմա կան պաշտոնյաներ, որոնք ասում են, թե ապացուցելու են, որ կարելի է լինել պաշտոնյա և պետական բյուջեից մի կոպեկ չուտել, հիմա ես հայտարարում եմ` ութ տարուց ավելի ՀՀ-ի բարձրագույն պաշտոնյաներից մեկն եմ, և որևէ մեկը չի կարող ներկայացնել, որ ես որևէ կոռուպցիոն սխեմայի մեջ եմ եղել, պետբյուջեից գոնե մեկ լումա յուրացրել կամ մսխել եմ»,- նշեց նա։
Զարուհի Փոստանջյանն այսօր ֆեյսբուքյան եթերում ցուցադրել է Շարմազանովի կիսակառույց շինությունը և հայտարարել, որ այն «կառուցվում է հանրային միջոցների՝ ժողովրդից թալանված փողերի հաշվին»:
«Եթե սրանից հետո որևէ մեկը փորձի իմ անունն արատավորել, ես պատիվս կպաշտպանեմ դատարանում»,- ասաց ՀՀԿ խոսնակը։
Նրա խոսքով` այդ կիսակառույց շինությունը նորություն չէ։
«Դա իմ հայտարարագրում գրված է, ութ տարի այդ մասին խոսում եմ, իններորդ տարին կառուցում եմ։ Աստված տա, շուտ կառուցեմ, բարի մարդկանց էլ հրավիրեմ իմ օջախ»,- ասաց նա։
Տեղեկացնենք, որ Զարուհի Փոստանջյանն իր ֆեյսբուքյան էջում հրապարակել է մի հոլովակ, որտեղ մատնացույց է անում, իր մեկնաբանությամբ, այն պետական պաշտոնյաների առանձնատները, որոնք այդ շինությունները կառուցել են «հանրային միջոցների» հաշվին։