ԵՐԵՎԱՆ, 21 հունիսի — Sputnik. Եվրախորհրդարանի անդամ, Արցախի հետ Բարեկամության խմբի ղեկավար Ֆրանկ Էնգելն իր ընտրյալ Տաթև Մանուկյանի հետ ամուսնանալուց հետո իր ազգանվանն ավելացրել է «յան» վերջածանցը։
Զույգի բրյուսելյան բնակարանի դռան վրա հայերեն գրված է «Էնգելյաններ»։
Ապացույցը ներկայացրել է Հայաստանի ԱԳՆ մամուլի քարտուղար Տիգրան Բալայանը։ Բրյուսելում հյուր գնալով Էնգել զույգին` նա լուսանկար է հրապարակել Twitter-ում։
Հիշեցնենք, որ Ֆրանկ Էնգելը (Լյուքսեմբուրգից), Յարոմիր Շտետինան (Չեխիա) և Էլենի Թեոխարուսը (Կիպրոս) անցած տարի այցելել էին Արցախ, որտեղ հետևել են 2017թ-ի փետրվարի 20-ին տեղի ունեցած սահմանադրական բարեփոխումների ընթացքին։ Դրանից հետո Ադրբեջանի միջազգային հետախուզություն է հայտարարել ԵԽ պատգամավորների նկատմամբ։
Սակայն Ինտերպոլը ուշադրություն չի դարձրել Ադրբեջանի դժգոհությանը և հետախուզություն չի հայտարարել։
2017թ-ին Էնգելը Խոր վիրապում նշանադրվել է իր ընտրյալի` Տաթև Մանուկյանի հետ։
Նորապսակները մեղրամիսն անցկացրել են Արցախում։ Մանուկյանը պարզաբանել է, որ որոշել են հրաժարվել Արցախում ամուսնանալու գաղափարից` հյուրերին երկար ճանապարհով չհոգնեցնելու համար։
Աղջիկը խոստովանել է, որ հայկական ավանդույթներով հարսանիքը չափազանց կարևոր է եղել Էնգելի համար։ Նա նաև պատրաստվում է հայերեն սովորել։
Զույգը մտածում է, թե ինչ ազգանուն է տալու ապագա երեխաներին։ Հնարավոր է` նրանց ազգանունը վերջանա «յան»-ով։