ԵՐԵՎԱՆ, 20 հունիսի — Sputnik. Մանվել Գրիգորյանի նկատմամբ հարուցված քրեական գործի վերաբերյալ նոր հայտարարություն է տարածել ՀՀ հատուկ քննչական ծառայությունը։ Ըստ այդմ` հիմնավոր կասկածներ կան, որ գեներալի անունով բացված հիմնադրամին փոխանցված միջոցները նպատակային չեն ծախսվել։
«ՀՀ ԱԺ պատգամավոր, ԵԿՄ նախագահ Մանվել Գրիգորյանի վերաբերյալ ՀՀ հատուկ քննչական ծառայությունում քննվող քրեական գործով պարզվել է, որ 12.02.2013թ.-ին Մանվել Գրիգորյանի կողմից ստեղծվել է «Գեներալ Մանվել Գրիգորյան» բարեգործական հիմնադրամը, որին տարբեր քաղաքացիներ և կազմակերպություններ ինչպես կանխիկ, այնպես էլ բանկային փոխանցման եղանակով հատկացրել են տարբեր չափերի գումարներ:
Քրեական գործով առկա են կասկածներ, որ հնարավոր է` նշված գումարները մուտք չեն եղել բարեգործական հիմնադրամ կամ հետագայում ծախսվել են ոչ նպատակային: Խնդրում ենք բոլոր այն քաղաքացիներին և կազմակերպություններին, որոնք կանխիկ կամ փոխանցումով գումարներ են հատկացրել նշված հիմնադրամին, դիմել ՀՀ հատուկ քննչական ծառայություն հետևյալ հասցեով` ք. Երևան, Վ. Վաղարշյան 13ա, հեռ.` (+374) 11 900 008:
Նախաքննությունը շարունակվում է». ասված է ծառայության տարածած հաղորդագրության մեջ։