ՀՀ պաշտպանության նախարարությունը պատասխանել է «հողեր ազատագրած» Զաքիր Հասանովին

ԵՐԵՎԱՆ, 20 հունիսի — Sputnik. ՀՀ պաշտպանության նախարարության մամուլի խոսնակ Արծրուն Հովհաննիսյանը ֆեյսբուքյան իր էջի միջոցով տեղեկացնում է, որ ադրբեջանցի հողագործների և հովիվների գործունեությունն այլևս շնորհիվ իրենց «ազատարար» նախարար Հասանովի վտանգված է։

«Զաքիր Հասանովին շնորհավորում ենք սեփական տարածքում, սեփական տասնյակ հազարավոր կմ հողատարածքների «ազատագրման» կապակցությամբ։

Մեկ իրողության փաստում միայն՝ ադրբեջանցի հողագործների և հովիվների գործունեությունը, որը շուրջ 25 տարի անվտանգ էր, այլևս շնորհիվ «ազատարար» Հասանովի վտանգված է, շեշտում եմ, շնորհիվ ադրբեջանական բանակի ազատարար նախարարի»,–գրել է Հովհաննիսյանը։

Իրականում, հունիսի սկզբին Ադրբեջանը դիմել է ՀՀ ՊՆ-ին՝ խնդրելով թույլատրել ադրբեջանցիներին այցելել Գյուննութ գյուղի իրենց գերեզմանատուն: Այստեղ նրանք ոչ միայն հարգել են նախնյաց հիշատակը, այլև լուսանկարվել։ Եվ այդ լուսանկարներն էլ հիմա ծառայում են ադրբեջանական քարոզչությանը: Հայկական զինուժի մարդասիրական քայլը, փաստորեն, Ադրբեջանը հերթական անգամ իր քարոզչական նպատակներին է ծառայեցրել:

Հայկական կողմը վստահեցնում է, որ լիարժեք տիրապետում է իրավիճակին:

Ավելի վաղ Ադրբեջանի ՊՆ Զաքիր Հասանովը հայտարարություն էր  տարածել, որ ադրբեջանական կողմը 11 հազար հեկտար հող է ազատագրել Նախիջևանի  հատվածում։ Նախարարն այդպիսով կրկնել էր սեփական ԶԼՄ–ների պնդումները։ Սակայն այդ հայտարարությունները ծաղր ու ծանակի էին ենթարկել անգամ ադրբեջանական նախկին դիվանագետներն ու բլոգերները։ Մասնավորապես` Արիֆ Մամադովը զառանցանք էր որակել 11 հազար հեկտարի մասին խոսակցությունները։

Նշենք, որ վերոհիշյալ Գյուննութ գյուղը գտնվում է Նախիջևանի և Արարատի մարզի սահմանային հատվածում: Ղարաբաղյան պատերազմի տարիներին, երբ գյուղը դեռ ադրբեջանցիների վերահսկողության տակ էր, այստեղից պարբերաբար հրետակոծում էին հայկական գյուղերը, մասնավորապես ՝ Զանգակատունն ու հարևան բնակավայրերը: 1992 թվականի մայիսի 9-ին Զանգակատուն գյուղի բնակիչ ազատամարտիկներն Արարատի և Արտաշատի կամավորական ջոկատների հետ համատեղ ուժերով հետ մղեցին Գյուննութի բարձունքում ծվարած ադրբեջանական զինյալներին: Այս գործողության շնորհիվ հայկական գյուղերն ազատվեցին Գյուննութի բարձունքից անդադար սպառնացող վտանգից: