ԵՐԵՎԱՆ, 20 հունիսի — Sputnik. Կալանավորված ՀՀԿ–ական պատգամավոր Մանվել Գրիգորյանին չի զարմացնում ԱԺ–ի պատգամավոր ընկերների քննադատությունը, Sputnik Արմենիային ասաց նրա փաստաբաններից մեկը` Արսեն Մկրտչյանը։
Ավելի վաղ Երևանի ընդհանուր իրավասության դատարանը որոշում էր կայացրել երկու ամիս ժամկետով կալանավորել ԱԺ պատգամավոր, ԵԿՄ նախագահ Մանվել Գրիգորյանին։
Մկրտչյանի խոսքով` քաղաքականությունը դատարանում տեղ չունի, բայց որոշ դատավորներ կարող են առաջնորդվել հեղինակավոր մարդկանց կարծիքներով։
«Եթե հայտնի մարդն ասում է, որ իրեն ինչ–որ բան դուր չի գալիս, բնականաբար, դա ազդում է դատարանի վրա։ Բայց քաղաքական հետապնդումների մասին խոսելը տեղին չէ»,–ասաց Մկրտչյանը։
Ինչ վերաբերում է հանրային ճնշմանը, նրա խոսքով, հայ հասարակությունը սովոր է նույնականացնել մեղադրյալի պաշտպանին պաշտպանյալի հետ։ Մկրտչյանի խոսքով` այդպես է եղել նախկին աղմկահարույց գործերի ժամանակ, երբեմն պաշտպաններն իրենց պաշտպանյալի հասցեին հնչացած մեղադրանքներն իրենց էին վերագրում։
Մանվել Գրիգորյանը չի ընդունում իրեն ներկայացրած մեղադրանքները, սակայն ադեկվատ է արձագանքում հասարակության և ընկերների արձագանքին։
«Գրիգորյանը հասկանում է` ընկերները հավերժ չեն։ Իսկ պատգամավոր ընկերներն այն մարդիկ են, ովքեր պատրաստ էին քվեարկել Նիկոլ Փաշինյանին անձեռնմխելիությունից զրկելու օգտին, իսկ այսօր նրան գովերգում են»,–ասաց Մկրտչյանը։
Պաշտպանի խոսքով` Գրիգորյանը դա ընդունում է ոչ որպես պատշաճ, սակայն նորմալ երևույթ։ Փաստաբանը համոզված է, որ նախկին ընկերները քննադատությամբ փորձում են հնարավորինս արագ իրենց հեռացնել գեներալից, որպեսզի նրանց անունները չկապվեն Գրիգորյանի հետ։
Գեներալնը ոչ ոքի չի մեղադրում, միայն ուզում է, որ մանրակրկիտ հետաքննություն անցկացվի։
Մամուլում լուրեր էին շրջանառվում այն մասին, թե Գրիգորյանի կնոջը` Նազիկ Ամիրյանին, ով հրամայել էր ամուսնու օգնականներին թաքցնել զինվորական սննդամթերքի մյուս մասը, մոտ ժամանակներս կարող են ձերբակալել։ Այս իրավիճակին անդրադառնալով` փաստաբանը նշեց, որ խոսքը դեռ երրորդ անձանց բացատրականների մասին է, հայտնի չէ, թե իրավիճակն ինչպես է մեկնաբանում Ամիրյանը։ Ամեն ինչ ցույց կտա քննությունը։
Հիշեցնենք` ՀՀ ԱԺ-ն երեկ ՀՀ գլխավոր դատախազության միջնորդագրի հիման վրա հավանության է արժանացրել Մանվել Գրիգորյանի նկատմամբ քրեական վարույթ իրականացնելու և նրա նկատմամբ խափանման միջոց կիրառելու առաջարկները։ Երևանի ընդհանուր իրավասության դատարանը որոշում ընդունեց 2 ամսով կալանավորել Մանվել Գրիգորյանին։
ԱԱԾ-ն հունիսի 17-ին տեսանյութ էր հրապարակել` ներկայացնելով ՀՀ Արմավիրի մարզի Արշալույս գյուղի Լճափնյա փողոցում գտնվող, Մանվել Գրիգորյանին սեփականության իրավունքով պատկանող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Տեսանյութում երևում է, որ Մանվել Գրիգորյանին պատկանող հանգստյան գոտին վերածվել էր զինապահեստի, ռետրո և ժամանակակից տասնյակ ավտոմեքենաների ավտոպարկի: Ակնալճի ամառանոցը գեներալի համար ծառայել է նաև «զինվորի բաժին» նշագրումով սննդի, հիգիենիկ պարագաների, դեղորայքի, զինվորական հանդերձանքի պահեստարանի: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռևս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր…
Մանվել Գրիգորյանը ձերբակալված է։ Նրան մեղադրանք առաջադրվել ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ Արմավիրի մարզի Արշալույս համայնքի, Էջմիածին քաղաքի մի քանի հասցեներում գտնվող, իրեն պատկանող առանձնատներում պահելու, ինչպես նաև մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար։
Դատախազությունը նրան մեղադրում է զինված ուժերի զենքը և այլ ունեցվածքը հափշտակելու համար։ Այդ հոդվածներով 2-6 և 5-8 տարվա ազատազրկում է սպառնում։