ԵՐԵՎԱՆ, 19 հունիսի — Sputnik. Պատգամավոր, գեներալ-լեյտենանտ Մանվել Գրիգորյանի առանձնատանը հայտնաբերված «գտածոն» ցնցել է նաև Արցախի բնակչությանը։ Նման եզրակացության կարելի է հանգել Ստեփանակերտից ստացվող մեկնաբանությունների հիման վրա։ Արցախում, ինչպես նաև Հայաստանում առանձին անձինք պահանջում են Գրիգորյանին զրկել Արցախի հերոսի կոչումից։
Երևանում Ստեփանակերտի ներկայացուցիչ Կառլեն Ավետիսյանն ընդունել է նախաձեռնող խմբի անդամներին, որոնք դիվանագետին նամակ են փոխանցել` պահանջելով Մանվել Գրիգորյանին զրկել հերոսի կոչումից։ Ակտիվիստների անունից խոսել է Արցախյան պատերազմի մասնակից, պաշտպանական մարտերում զոհված Լյովա Կատվալյանի որդին։
Ինչպես նշեցին ակտիվիստները, Մանվել Գրիգորյանի հետ կապված բացահայտումները բարոյական զզվանք են առաջացրել հայության մոտ, քանի որ գեներալ Մանվելը Արցախի հերոս է համարվում։
«Մեզ` երիտասարդներիս, և այն մարդկանց համար, որոնք կապված են Արցախյան պատերազմի ժամանակ զոհվածների ընտանիքների հետ, բոլորի համար շոկ էր, որ մարդը կարող էր յուրացնել զինվորներին փոխանցված տեխնիկան, սնունդը և այլն», — ասաց երիտասարդներից մեկը։
Ինչպես նշեցին ակտիվիստները, Մանվել Գրիգորյանին հերոսի կոչում են տվել ԼՂՀ իշխանությունները, և ինչպես էլ Հայաստանում ընթանա գեներալի դատավարությունը, նրան այդ կոչումից կարող են զրկել միայն Ստեփանակերտում։ Նրանք Ավետիսյանին նամակ փոխանցեցին, որում կոչ էին անում հնարավորինս արագ Մանվել Գրիգորյանին զրկել Արցախի բարձրագույն պարգևից։ Նրանք վստահեցրին` այդ անունը չի կարող լինել իրական հերոսների ցանկում։
«Նման հայերն ընդհանրապես գոյության իրավունք չունեն, առավել ևս գեներալ լինելու և հերոս կոչվելու։ Նման մարդիկ չարիք են ցանկացած ազգի համար», — գրված է հաղորդագրության մեջ։
Կարլեն Ավետիսյանը խոստացավ ակտիվիստների նամակն առաջիկայում փոխանցել Արցախի իշխանություններին։
Մանվել Գրիգորյանին Արցախի հերոսի կոչումից զրկելու հավանականության մասին Sputnik Արմենիան խոսել է նաև Արցախի նախագահի մամուլի քարտուղար Դավիթ Բաբայանի հետ։
Նա նշեց, որ որևէ մեկին Արցախի հերոսի կոչումից զրկելու նախադեպ դեռ չի եղել, իսկ Մանվել Գրիգորյանին այդ կոչումից զրկելու թեման դեռ վաղաժամ է քննարկել։
«Մեզ մոտ առ այսօր նախադեպ չի եղել, հետևաբար որպեսզի դա տեղի ունենա, ամեն ինչ պետք է արդեն ապացուցված լինի, իսկ դա ցույց կտա դատավարությունը»,- ասաց նա։
Բաբայանը նշեց, որ Գրիգորյանի հետ կապված դեպքերն, անշուշտ, շատ վատ տպավորություն թողեցին մարդկանց վրա, հասարակությունը տարակուսեց, բայց դա չի նշանակվում, որ պետք է առաջնորդվել զգացմունքներով։
«Նողկալի բաներ են տեղի են ունեցել, բայց նորմալ, քաղաքակիրթ երկրում դրա վերջնական գնահատականը պետք է տա միմիայն դատարանն ու ազատ, թափանցիկ դատավարությունը, որպեսզի ժողովուրդն էլ իմանա, թե ինչպես է այդ ամենը եղել, դրան արդարացում կա՞, թե՞ ոչ»,- ընդգծեց նա։
Բաբայանի խոսքով` երբ ամբողջ պատկերը պարզ լինի, նոր կարելի է անդրադառնալ Արցախի հերոսի կոչումից զրկելու հարցին։
Քանի որ դա չկա, նրա կարծիքով, ցանկացած նման երևույթ շահարկում կլինի և ինչ-որ տեղ ուղղորդիչ կհանդիսանա դատավարության ժամանակ, ինչն անթույլատրելի է։