ԵՐԵՎԱՆ, 19 հունիսի — Sputnik. ԱԺ-ն բազմաթիվ միջնորդություններ է քննարկել, բայց սրա նմանը չի եղել, սա աննախադեպ է։ Այսօր Ազգային ժողովում ասաց ՀՅԴ խմբակցության ղեկավար Արմեն Ռուստամյանը։
«Սա այն դեպքն է, երբ չկան տարբեր ճամբարներ։ Բոլորս հասկանում ենք պահի լրջությունը, բոլորս հասկանում ենք մեր պատասխանատվությունը։ ՀՅԴ-ն կողմ է քվեարկելու երկու միջնորդություններին էլ, որովհետև դեմ լինելը նշանակում է խոչընդոտել արդարադատությանը»,- ասաց նա։
Հայաստանի Հանրապետական կուսակցության անունից հանդես եկավ խմբակցության ղեկավար Վահրամ Բաղդասարյանը։
Նա նշեց, որ մինչ ԱԱԾ հրապարակումները ՀՀԿ ներկայացուցիչները տարբեր ելույթներ են ունեցել` չիմանալով բացահայտումների մասին։
«Հարգելով անմեղության կանխավարկածը` մենք չենք խոչընդոտելու արդարադատությանը։ Եթե կհաստատվեն ներկայացված մեղադրանքները, մեղավորները պետք է պատժվեն օրենքի ողջ խստությամբ, մեղավորները չպիտի պաշտպանվեն` անկախ իրենց դիրքից, անկախ իրենց անցյալից»,- ասաց Բաղդասարյանը։
Մանվել Գրիգորյանի նկատմամբ քրեական հետապնդում իրականացնելու և պատգամավորական անձեռնմխելիությունից զրկելու հարցի քվեարկությունն ԱԺ միջանցքում կկայանա այսօր 12։30-13։00, որից հետո կհրապարակվեն քվեարկության արդյունքները։