ԵՐԵՎԱՆ, 18 հունիսի — Sputnik. Իրանը մտադիր է ավելացնել Հայաստան մատակարարվող գազի ծավալները մինչև օրական 1,6 միլիոն խորանարդ մետր։ Այս մասին հայտնեց Իրանի ազգային գազի ընկերության (NIGC) գլխավոր տնօրեն Համիդ Ռեզա Արաղին։
Ներկայումս Հայաստանն Իրանից օրական մոտ մեկ միլիոն խորանարդ մետր գազ է ստանում։
Արաղիի խոսքով` կողմերն ավելի վաղ պայմանավորվել էին մեծացնել «երկնագույն վառելիքի» մատակարարման ծավալները։ NIGC տնօրենն ասաց, որ գազի ծավալների աճին զուգահեռ կաճեն նաև Հայաստանից Իրան մատակարարվող էլեկտրաէներգիայի ծավալները։
Նշենք, որ Հայաստան-Իրան գազատարը շահագործման է հանձնվել 2007 թ-ին։ Գազատարով մատակարարվող իրանական գազը օգտագործվում է Երևանի ՋԷԿ-ի և քիչ ծավալներով Հրազդանի ՋԷԿ-ի 5-րդ էներգաբլոկի համար։ Արտադրված էլեկտրաէներգիայի մի մասը արտահանվում է Իրան, մյուս մասը մնում է Հայաստանում։ Գազատարի տարողունակությունն օգտագործվում է 20 տոկոսով։ Կողմերի միջև կա պայմանավորվածություն՝ Հայաստանը Իրանից ստացվող 1 խմ գազի դիմաց 3 կՎտ/ժ էլեկտրաէներգիա է մատակարարում։ Հայաստան մատակարարվող իրանական գազի ընդհանուր ծավալը տարեկան մոտ 400 միլիոն խորանարդ մետր է կազմում: