ԵՐԵՎԱՆ, 14 հունիսի — Sputnik. Երևանի քաղաքապետարանում, մասնավորապես` «Երևան» հիմնադրամում ԱԱԾ ձեռնարկած վերջին գործողություններում, ՀՀԿ խոսնակ Էդուարդ Շարմազանովը քաղաքական ենթատեքստ է տեսնում։ Այս մասին նա հայտնեց այսօր ՀՀԿ գործադիր մարմնի նիստի ավարտին` լրագրողների հետ ճեպազրույցում։ «Առնվազն ձևի առումով «Երևան» հիմնադրամում ձեռնարկված գործողությունները ոչ համաչափ էին»,– ասաց նա` տեղի ունեցածը համեմատելով 1937թ.–ի հետ։
«Ես չեմ կարծում, որ հիմա 37 թիվն է կամ չեմ կարծում, որ եթե ցանկանային փաստաթղթեր ստանալ, չէին կարող առանց դիմակների մեր հարգարժան իրավապահ մարմիններն ստանային։ Սա իմ կարծիքն է, որը կիսում են նաև իմ կուսակցական ընկերները»,– ասաց նա։
Անդրադառնալով Մանե Թանդիլյանի պաշտոնանկությանը, Էդուարդ Շարմազանովն ափսոսանք հայտնեց` նշելով, որ նա հայրենասեր ու սկզբունքային գործիչ է, բայց տեղի ունեցածը Փաշինյանի թիմի ներքին խնդիրն է։
«Մենք պետականամետ, կառուցողական քաղաքական ուժ ենք։ Պոպուլիստական, էժան դիվիդենտներ ակնկալող հայտարարություններ մեզանից մի սպասեք։ Մենք և իշխանության և ընդդիմության մեջ ունենք հստակ արժեքային համակարգ և շարունակելու ենք գնալ այդ ուղղությամբ»,– ասաց նա։
Անկախ նրանից, թե ով կլինի վարչապետը ՀՀԿ–ն, Շարմազանովի խոսքով, պատրաստ է աջակցել այն անձին, ով արցախյան կարգավորման հարցում կվարի հայանպաստ բանակցություններ։