ԵՐԵՎԱՆ, 13 հունիսի — Sputnik. ԱԺ պատգամավորները հանդես են եկել Սամվել Բաբայանի և Սանասար Գաբրիելյանի կալանքը որպես խափանման միջոց փոխելու անձնական երաշխավորությամբ: Facebook սոցիալական ցանցում այս մասին հայտնում է «Ծառուկյան» խմբակցության քարտուղար Վահե Էնֆիաջյանը։
Պատգամավորները երաշխավորում են, որ մեղադրյալներ Սամվել Բաբայանը և Սանասար Գաբրիելյանը, գտնվելով ազատության մեջ, կդրսևորեն պատշաճ վարքագիծ, չեն խուսափի իրենց դատավարական պարտականությունները պատշաճ կատարելուց` քրեական վարույթն իրականացնող մարմնի կանչով ներկայանալուց։
«Սամվել Բաբայանի և Սանասար Գաբրիելյանի նկատմամբ որպես խափանման միջոց կիրառված կալանքը սույն անձնական երաշխավորության հիմքով փոփոխելու կամ փոխարինելու պարագայում ստանձնում ենք դրանից բխող բոլոր պարտավորությունները»,- նշված է երաշխավորագրում։
Հայտարարության տակ ստորագրել են պատգամավորներ Նաիրա Զոհրաբյանը, Արամ Սարգսյանը, Վահան Կարապետյանը, Հրանտ Մադաթյանը, Սերգեյ Բագրատյանը, Արայիկ Աղաբաբյանը, Արարատ Զուրաբյանը, Վարդան Բոստանջյանը, Վահե Էնֆիաջյանը, Տիգրան Ստեփանյանը, Իվետա Տոնոյանը։
ԱԱԾ-ն Սամվել Բաբայանին ձերբակալել է 2017 թ-ին` «Իգլա» տեսակի զենիթահրթիռային համալիր մաքսանենգ ճանապարհով Հայաստան բերելու գործի շրջանակում:
Բաբայանը չի ընդունում իրեն առաջադրված մեղադրանքը, ըստ որի՝ նա նախնական համաձայնությամբ դրդել է մի խումբ անձանց ապօրինի կերպով ձեռք բերել «Իգլա» տեսակի դյուրակիր զենիթահրթիռային համալիր և այն փոխադրել Հայաստան:
«Իգլայի» գործով կալանավորված Սանասար Գաբրիելյանը կոչումով փոխգնդապետ է, ավելի քան տասը տարի ծառայել է Հայաստանի զինված ուժերում։