ԵՐԵՎԱՆ, 13 հունիսի — Sputnik. ՀՀ տնտեսական զարգացման և ներդրումների նախարար Արծվիկ Մինասյանը հրաժարական չի տա։ Այսօր ԱԺ-ում լրագրողների հետ զրույցում այս կարծիքը հայտնեց ԱԺ ՀՅԴ խմբակցության ղեկավար Արմեն Ռուստամյանը` անդրադառնալով աշխատանքի և սոցիալական հարցերի նախարար Մանե Թանդիլյանի հրաժարականին։
«Մանե Թանդիլյանի պարագան մի քիչ այլ էր, որովհետև ինքը հենց այդ ոլորտի ղեկավարն էր և ներկայացրել էր մի նախագիծ, որը մերժվել էր, և որը մենք էլ էինք պաշտպանում։ Կարծում եմ` այս իրավիճակում պետք է հետևողական լինել պարտադիր բաղադրիչը վերացնելու հարցում»,- ասաց Ռուստամյանը։
Նա շեշտեց, որ կուսակցությունը դեմ լինելով պարտադիր բաղադրիչին` կողմ չի լինելու ներկայացված տարբերակին։ Ռուստամյանի խոսքով` դրանով միայն մեղմացվել է գործող օրենքը, բայց պարտադիր պայմանը չի վերանայվել։
«Մի տոկոսն էլ մնա պարտադիր բաղադրիչից, մենք համարելու ենք, որ հարցը չի լուծվել»,- ասաց Ռուստամյանը։
Հիշեցնենք` հունիսի 11-ին ՀՀ կառավարությունն արտահերթ նիստում ընդունել էր կուտակային կենսաթոշակային պարտադիր համակարգում փոփոխություններ անելու մասին նախագիծը, որով առաջարկվում է գործող 5/5 համամասնության փոխարեն սահմանել 2.5/7.5 համամասնությամբ վճարում, այսինքն վճարման 2.5%-ը պետք է վճարի քաղաքացին, 7.5%-ը`պետությունը։ Նիկոլ Փաշինյանը նշել է, որ դրանով շահառու քաղաքացիների բեռը զգալի կնվազի, աշխատավարձերը որոշակի չափով կավելանան։
Տնտեսական զարգացման և ներդրումների նախարար Արծվիկ Մինասյանը դեմ էր արտահայտվեց նախագծին` նշելով, որ իր քաղաքական թիմը` ՀՅԴ-ն, սկզբունքորեն դեմ է պարտադիր բաղադրիչին, և ինքը չի կարող կողմ լինել նախագծին։
Վարչապետ Փաշինյանին զայրացրել էր նախարարի այս դիրքորոշումը։ Նա ասել էր, որ ոչ ոք չպետք է դեմ քվեարկի ընդունվող որոշումներին։
Երեկ հայտնի դարձավ, որ հրաժարականի դիմում է ներկայացրել ՀՀ աշխատանքի և սոցիալական հարցերի նախարար Մանե Թանդիլյանը, որը մինչ այդ նախագիծ էր ներկայացրել հուլիսի 1-ից ուժի մեջ մտնող պարտադիր բաղադրիչը մեկ տարով հետաձգելու մասին։
Հիշեցնենք, հուլիսի 1-ից ուժի մեջ մտնող կուտակային կենսաթոշակային համակարգի պարտադիր բաղադրիչը տարածվելու է 1974 թվականի հունվարի 1-ից հետո ծնված բոլոր աշխատողների համար։ Մինչև այդ համակարգին միացել էին պետական կառավարման համակարգի աշխատակիցները և նրանք, ովքեր մեկ տարի առաջ ինչ-ինչ պատճառով համակարգից հրաժարվելու դիմում չէին գրել։