ԵՐԵՎԱՆ, 9 հունիսի — Sputnik. «Արի տուն» և «Սփյուռք ամառային դպրոց» ծրագրերը մեկտեղվելու են, Facebook սոցիալական ցանցի ուղիղ եթերում ասաց ՀՀ սփյուռքի նախարար Մխիթար Հայրապետյանը։
Նրա խոսքով` մեր հայրենակիցներից շատերը մտավախություն ունեին, որ «Արի տուն» «Սփյուռք ամառային դպրոց» և «Իմ Հայաստան» ծրագրերն ընդհանարապես կչեղարկվեն, մինչդեռ խոսքը ժամանակավորապես հետաձգելու մասին է։
«Վերահաստատում եմ, որ ծրագրերը ոչ մի դեպքում չեն կասեցվում։ Մենք մտավախություն ունեինք և շարունակում ենք ունենալ, որ կային կոռուպցիոն ռիսկեր։ Համարում ենք, որ տենդերների իրականացման ժամանակ թափանցիկություն և հավասար պայմաններ չեն ապահովվել»,- նշեց նախարարը։
Հայրապետյանը հայտնեց նաև, որ լավ նորություն ունի մեր հայրենակիցների համար։
«Մեծ էր մտահոգությունը, որ եթե ծրագիրը հետաձգվեր, սփյուռքահայ երեխաները կկորցնեին Հայաստան գալու հնարավորությունը։ Մենք օպերատիվ խումբ ստեղծեցինք, աշխատեցինք և եկանք այն տեսակետին, որ ծրագիրը կիրականացվի այս ամռանը»,- ասաց նա։
«Արի տուն» և «Սփյուռք ամառային դպրոց» մեկտեղված ծրագիրն ունենալու է երկու կոմպոնենտ՝ կրթական և ճանաչողական։ Ծրագիրը լինելու է քսանօրյա, նախնական տվյալով` մեկնարկելու է օգոստոսի 10-ին։
«Իսկ նրանք, ովքեր չեն կարողացել ավիատոմսերը հետ վերադարձնել, մոտ 150 հոգի, նրանք միանշանակ կվայելեն մեր նախարարության աջակցությունը, նախատեսված ծրագիրը, որը լինելու է համեմատաբար ոչ հագեցած, անցումային, կոմպրոմիսային ծրագիր, իրականանալու է»,-ասաց Հայրապետյանը:
Նախարարը հայաստանաբնակներին խնդրեց օգնել այս հարցում։
«Ահավասիկ այս բարդ գործում նախարարությունն ունի ձեր աջակցության կարիքը: ՀՀ քաղաքացիներին կոչ ենք անում հնարավորության դեպքում 2-3 շաբաթով իրենց տանը հյուրընկալել սփյուռքից ժամանած մեր հայրենակիցներին»,- ասաց Հայրապետյանը:
Նախարարը նշեց, որ այդպիսով նախարարությունը կկարողանա շրջանցել կոռուպցիոն ռիսկերը, իսկ օգոստոսին կայանալիք ծրագրի համար նոր մրցույթ է հայտարարվելու:
Հայաստանի Հանրապետության սփյուռքի նախարարությունն «Արի տուն» ծրագիրն իրականացնում է 2009 թվականից։ Ծրագրի հիմնական նպատակն է սփյուռքահայ երիտասարդների ծանոթությունը Հայաստանի պատմությանը, մշակույթին, հասարակական կյանքին, հոգևոր և ընտանեկան ավանդույթներին։ Ծրագիրը ներառում է այցելություններ Հայաստանի պատմամշակութային վայրեր, համերգներ, փառատոներ, ցուցահանդեսներ, թատերական ներկայացումներ, հայոց լեզվի, գրականության, պարարվեստի, հայոց պատմության և եկեղեցական ավանդույթների ուսուցում։ Ծրագրի կարևոր բաղադրիչն է շփումը Հայաստանի և Սփյուռքի հասակակիցների միջև, ինչպես նաև հանդիպումները պետական և հասարակական ակնառու գործիչների հետ։
Ծրագրին կարող են մասնակցել 13-17 տարեկան սփյուռքահայ երիտասարդները։