ԵՐԵՎԱՆ, 9 հունիսի — Sputnik. Երևանի «Արաբկիր» բժշկական կենտրոնում 5 ամսական երեխա է մահացել: ՀՀ ոստիկանության լրատվական բաժնից Sputnik Արմենիային հաստատեցին լուրը՝ նշելով, որ երեխան ծայրահեղ ծանր վիճակում հիվանդանոց է ընդունվել հունիսի 7-ին, 16:15-ին, իսկ ժամը 18:20-ին «Արաբկիր» բժշկական կենտրոնից ոստիկանությանը հայտնել են, որ նույն օրը, ժամը 17:50-ին երեխան մահացել է:
Թե ինչն է եղել երեխայի մահվան իրական պատճառը, պարզ կլինի դատաբժշկական փորձաքննությունից հետո:
Shamshyan.am կայքի տեղեկություններով` երեխան դեպքից օրեր առաջ հերթական պատվաստումն է ստացել Հերացու անվան պոլիկլինիկայում, ծնողները կարծում են, որ դեպքը դրա հետևանք է:
Նույն կայք գրում է, որ ըստ նախնական տեղեկությունների՝ երեխայի մահվան պատճառը եղել է «սուր միոկարդիտը»։ Մասնագետներն այն կարծիքին են, որ երեխան պատվաստման հետևանքով չէր կարող մահանալ։
Sputnik Արմենիան փորձեց մեկնաբանություն ստանալ նշված բժշկական հաստատություններից, սակայն թե՛ «Արաբկիր» բժշկական կենտրոնում, թե՛ Հերացու անվան պոլիկլինիկայում հրաժարվեցին մեկնաբանություններից: