ԵՐԵՎԱՆ, 7 հունիսի — Sputnik. Ամենավատ բանը քննադատությունը մերժելն է։ Այսօր ԱԺ-ում կառավարության ծրագրի քննարկման եզրափակիչ ելույթում նշեց ՀՀ վարչապետ Նիկոլ ՓԱշինյանը:
«Յուրաքանչյուր քննադատության մեջ կարելի է գտնել մի ռացիոնալ բան»,- ասաց Փաշինյանը՝ անդրադառնալով կառավարության ծրագրի շուրջ հնչած քննադատություններին:
Այն, որ ծրագրում չկան թվեր, Նիկոլ Փաշինյանը չհամաձայնեց ու որոշեց ներկայացնել թվերը: «Ինչպիսին է լինելու Հայաստանում կոռումպացված պաշտոնյաների թիվը, ես պաշտոնապես հայտարարում եմ այդ թիվը՝ 0, ինչպիսին է լինելու Հայաստանում արտոնյալների թիվը, ես պաշտոնապես հայտարարում եմ այդ թիվը՝ 0, Հայաստանում խոշոր բիզնեսն ամսական որքան պիտի վճարի ՀՀ վարչապետին, ես պաշտոնապես հայտարարում եմ այդ թիվը՝ 0, Հայաստանում քանի մենաշնորհ պիտի գոյություն ունենա, ես պաշտոնապես հայտարարում եմ այդ թիվը՝ 0»,- ասաց Փաշինյանը:
Նիկոլ Փաշինյանը համաձայնեց ԱԺ ելույթներում հնչած այն տեսակետի հետ, թե ներկայացված ծրագիրը երազանքների ծրագիր է:
«Այո, սա երազանքների ծրագիր է և երազանքների երկիր ունենալու ծրագիր է: Սա մեր կառավարության գործունեության ամենակարևոր կողմն է»,- ասաց նա:
Նիկոլ Փաշինյանը վստահեցրեց` այն պահին, երբ կզգա, որ այլևս չունի ժողովրդի վստահությունը, մի վայրկյան անգամ չի մնա այդ պաշտոնում:
Ինչ վերաբերում է ՀՀԿ-ի հայտարարությանը՝ կառավարության ծրագրի ընդունմանը չխոչընդոտելու վերաբերյալ, Նիկոլ Փաշինյանը հայտարարեց. «Մենք որևէ մեկի լավության կարիքը չունենք, մեզ ընտրել է Հայաստանի ժողովուրդը, մենք ծառայելու ենք ժողովրդին: Մենք զգում ենք ժողովրդի աջակցությունն ու վստահությունը: Դա մեծ պատիվ է` լինել ժողովրդի վստահության կրողը»,- ասաց նա: