ԵՐԵՎԱՆ, 2 հունիսի — Sputnik. ՀՀ առաջին փոխվարչապետ Արարատ Միրզոյանը ֆեյսբուքյան իր էջում մեկնաբանել է, թե ինչու է հայկական պատվիրակությունը Դուշանբե մեկնել վարչապետի ինքնաթիռով։ ԱՊՀ երկրների կառավարությունների ղեկավարների խորհրդի նիստից վերադառնալուն պես նա տեղեկացել է, որ մի քանի լրատվամիջոցներ և ֆեյսբուքյան օգտատերեր կասկածի տակ են դրվել հայկական պատվիրակության՝ ՀՀ «թիվ մեկ բորտով»՝ վարչապետի ինքնաթիռով մեկնելու նպատակահարմարությունը։
«Ասեմ, որ հակառակ դեպքում մեր 20 հոգանոց պատվիրակությունը (ներառյալ ԶԼՄ ներկայացուցիչները) ստիպված էր լինելու մեկնել Մոսկվայով, իրարից տարբեր և ոչ այնքան մոտ չվերթերով և կրկին լուրջ, գրեթե համարժեք գումար էր ծախսելու ավիատոմսերի, սննդի և հյուրանոցային վճարների վրա»,- գրել է նա։
Ըստ Միրզոյանի` ամենաէականը, սակայն, այն էր, որ ստիպված էին լինելու մեկնել մայիսի 30-ին և վերադառնալ հունիսի 2-ին։
«Այ երկու աշխատանքային օրվա վատնումը ճանապարհի վրա ամենաիսկական շքեղություն կլիներ իմ համար։ Կներեք, բայց ես դա ինձ թույլ տալ չեմ կարող այս օրերին, երբ իմ աշխատանքային գրաֆիկն այնքան հագեցած է, որ ես աշխատանքի եմ գնում առավոտյան շուտ և վերադառնում եմ գիշերը շատ ուշ»,- ընդգծել է նա։
Ըստ Միրզոյանի`ֆինանսական խնայողություններն, իհարկե, իրենց առաջնահերթություններից են։
«Միաժամանակ պետք է հասկանանք, որ ծախսեր կան, որ պետք է արվեն՝ պետական կառավարման համակարգի արդյունավետ աշխատանքի, ինչու չէ՝ նաև մեր երկրի պատշաճ ներկայանալու համար»,- նշել է փոխվարչապետը։
Նա իր գրառման վերջում ավելացրել է. «Ձեր խոնարհ ծառա, ՀՀ առաջին փոխվարչապետ Արարատ Միրզոյան»։
ԱՊՀ երկրների կառավարությունների ղեկավարների խորհրդի նիստը կայացել է Դուշանբեում մայիսի 31–ին և հունիսի 1–ին։
Նշենք, որ լրատվամիջոցների հաշվարկով` նման թռիչքը ՀՀ բյուջեի վրա 20 միլիոն դրամից ավելի է նստում։