ԵՐԵՎԱՆ, 1 հունիսի — Sputnk. Կառավարության այսօրվա նիստում Նիկոլ Փաշինյանը հիշեցրեց, որ ինքը կոչով դիմել էր արտերկրում բնակվող զինապարտ զորակոչիկներին՝ վերադառնալ Հայաստան ու կատարել իրենց պարտքը՝ լրացուցիչ խնդիրներից խուսափելու համար:
Վարչապետը հետաքրքրվեց, թե արդյոք եղել են իր կոչին արձագանքողներ: ՀՀ պաշտպանության նախարար Դավիթ Տոնոյանի խոսքից պարզ դարձավ, որ արձագանքողներ չեն եղել:
«Նրանց մեջ կան հետախուզման մեջ գտնվողներ, որոնք Հայաստան հասնելուն պես կարող են իրավապահների հետ խնդիրներ ունենալ»,- ասաց Տոնոյանը՝ դրանով մեկնաբանելով նաև վարչապետի կոչն անարձագանք թողնելու հանգամանքը:
Փաշինյանը կառավարության անդամներին հրահանգեց հարցի լուծում գտնել:
«Կարծում ենք` նրանցից ամեն մեկի դեպքում առանձին մոտեցում պետք է լինի, քանի որ խնդիրները տարբեր են»,- ասաց Տոնոյանը:
Վարչապետն ընդգծեց, որ զինապարտների մեջ կան արտերկրում բարձրագույն կրթություն ստացած մասնագետներ։ Փաշինյանը ՊՆ-ին հանձնարարեց նրանց մասնագիտական կարողություններն օգտագործել ի նպաստ Հայաստանի ռազմական ոլորտի զարգացման, մասնավորապես՝ ՀՀ ռազմաարդյունաբերական համալիրում: