ԵՐԵՎԱՆ, 31 մայիսի — Sputnik, Լաուրա Սարգսյան. Հայաստանի մշակույթի նախարար Լիլիթ Մակունցը «Հովհաննես Թումանյանի տուն» գիտակրթական կենտրոնի տնօրենին առաջարկել է համատեղ նախագծեր մշակել համագործակցության համար։
Այդ մասին Sputnik Արմենիայի թղթակցի հետ զրույցում ասաց Հայ առաքելական եկեղեցու վիրահայոց թեմի մամուլի քարտուղար Սուսաննա Խաչատրյանը։
Հայտնի գրողի տանը, որտեղ գտնվում է գիտամշակութային կենտրոնը, հայկական պատվիրակությանը թեյը և քաղցրավենիք են հյուրասիրել։ Թեյախմությունը կազմակերպվել է թբիլիսյան ավանդույթներով։
Բացի այդ, հյուրերը դիտել են «Բարեկենդան» տիկնիկային ներկայացումը։
Խաչատրյանը նշեց, որ Հայաստանից ժամանած բարձրաստիճան հյուրերը գոհ են մնացել ընդունելությունից։
«Թումանյանի տունն իր հյուրընկալությամբ մեծ տպավորություն է թողել նրանց վրա։ Վարչապետը գոհ էր», — ասաց Խաչատրյանը։
Նույն օրը Փաշինյանը հանդիպել է վրացի և հայ գործարարների հետ։ Նա ասել է, որ երկու կողմերն էլ ուզում են վերսկսել տնտեսական հանձնաժողովի աշխատանքը։ Վարչապետն ընդգծել է Հայաստանի և Վրաստանի գործարար օղակների համագործակցության զարգացման կարևորությունը։
Ջավախք մեկնելուց առաջ հայկական պատվիրակությունը հանդիպել է Վրաստանի կաթողիկոս-պատրիարք Իլյա 2-րդի հետ։
ՀՀ վարչապետ Նիկոլ Փաշինյանի գլխավորությամբ հայկական պատվիրակության առաջին պաշտոնական այցը Վրաստան մեկնարկեց մայիսի 30-ին։ Փաշինյանի՝ Թբիլիսի այցի առաջին օրը ժամագրված էր ամեն րոպեն։ Հայկական պատվիրակությանը «Շոթա Ռուսթավելի» միջազգային օդանավակայանում դիմավորել է Վրաստանի փոխվարչապետ, արտգործնախարար Միխեիլ Ջանելիձեն։
Փաշինյանն այցի ընթացքում հանդիպել է նաև Վրաստանի վարչապետ Գեորգի Կվիրիկաշվիլու, Վրաստանի նախագահ Գեորգի Մարգվելաշվիլու, ինչպես նաև Վրաստանի խորհրդարանի խոսնակ Իրակլի Կոբախիձեի և Թբիլիսիի հայ համայնքի ներկայացուցիչների հետ։