ԵՐԵՎԱՆ, 31 մայիսի — Sputnik. Գյումրիում ապօրինի հարստացածներ չկան: Այսօր ԱԺ-ում, լրագրողների հետ զրույցում հայտարարեց Գյումրու նախկին քաղաքապետ, ԲՀԿ պատգամավոր Վարդան Ղուկասյանը:
«Գյումրին ամենախեղճ մարզն է, այնտեղ հարուստ մարդ չկա»,- ասաց նա՝ պատասխանելով հարցին, թե արդյոք մտավախություն չունի, որ ԱԱԾ բացահայտումները մի օր կհասնեն Գյումրի:
Ղուկասյանը մտավախություն չունի անգամ, որ բացահայտումները ոչ միայն Գյումրի, այլև հենց իրեն կհասնեն: Նրա խոսքով`իր ունեցվածքի մասին լուրերն ուռճացված են ու լրատվամիջոցներում պարբերաբար հայտնվում են պատվերով:
«Ես ԽՍՀՄ ժամանակահատվածից մինչև վերջերս ունեցել եմ մեծ գործարաններ: Շիրակի մարզում առաջին կոոպերատիվը ես եմ բացել, այդպես աշխատել եմ իմ եղբայրների հետ: Իսկ դուք թողել եք միլիարդները, ընկել եք իմ հետևից»,- լրագրողներին ասաց Ղուկասյանը: Անդրադառնալով իր՝ ՀՀԿ անդամ լինելուն, նա հայտարարեց, որ երբեք կուսակցական չի եղել:
«Ես 2007թ-ին ստիպված պետք է քաղաքական մի հենարան ունենայի, որովհետև կուսակցությունները խեղդում էին քաղաքապետներին, չէին թողնում աշխատել, ստիպված մտել եմ կուսակցություն, որ կարողանամ աշխատել, իրենք են առաջարկել: Ես 2007-12թթ ՀՀԿ ոչ մի խորհրդի նիստի մի անգամ չեմ մասնակցել, ոչ մի խորհրդակցության չեմ մասնակցել։ Դուք մոռացել եք սատանաներին, որոնց ճակատներին, ջաներին էլ տեղ չի մնացել կուսակցություններ փոխելով, ինձ եք ասում»,- ասաց Ղուկասյանը՝ այսպես մեկնաբանելով ՀՀԿ-ից ԲՀԿ տեղափոխվելու, իսկ ապրիլին Գյումրիում Նիկոլ Փաշինյանի հանրահավաքներին ակտիվ մասնակցելու մասին լրագրողների դիտարկումներին: