ԵՐԵՎԱՆ, 31 մայիսի — Sputnik. Քաղաքականությունն այստեղ կապ չունի, Ռոսսելխոզնադզորը Հայաստանից ներմուծվող ապրանքները քաղաքականության պատճառով չէ, որ արգելում է։ Այս մասին ԱԺ–ում լրագրողներին հայտնեց գյուղնախարար Արթուր Խաչատրյանը։
Մրգի ու բանջարեղենի խմբաքանակները միշտ չէ, որ խոտանվում են, այլ միայն եզակի դեպքերում` և ոչ քաղաքական նկատառումներից ելնելով, այլ հաճախ սանիտարական պատճառներով, ընդգծեց նախարարը։
Վերջին անգամ խնդիրը լոլիկի ցեցն էր։ Վարակված բանջարեղենի արտահանումը հետագայում բացառելու համար, գյուղատնտեսության նախարարությունը նշել է այն գոտիները, որոնք վարակված են այդ վնասատուով, և կփորձի հնարավորինս արագ վերացնել այդ խնդիրը։
«Իսկ մինչ խնդիրը կլուծվի լոլիկ այդ շրջաններից չի արտահանվի», – հայտեց Խաչատրյանը։
Նշենք, որ օրեր առաջ Ռոսսելխոզնադզորի ղեկավար Սերգեյ Դանկվերտը, ելույթ ունենալով Մոսկվայում, նույնպես կոչ էր արել չքաղաքականացնել Հայաստանից մատակարարումների իրականացման հարցը։
Հիշեցնենք, որ մայիսին Ռոսսելխոզնադզորը արգելել է Հայաստանից լոլիկի մի քանի խմբաքանակի ներկրումը։ Ռուսական կողմի պարզաբանման համաձայն` արտահանված լոլիկում հայտնաբերվել էր լոլիկի վնասատու։ Արգելքի դեպքերը շատացել են, սակայն դրանք զանգվածային չեն։ Մայիսին Հայաստանից Ռուսաստան մոտ 9200 տոննա ընդհանուր ծավալի լոլիկներով բեռնված 450 ավտոմեքենա է տեղափոխվել։ Ընդ որում` դրանից 27–ի դեպքում Ռոսսելխոզնադզորը լոլիկների խմբաքանակի մեջ լոլիկի ցեց է հայտնաբերել։