ԵՐԵՎԱՆ, 31 մայիսի — Sputnik. Մեկ առևտրային ցանցը, որքան էլ խոշոր լինի, չի կարող ամբողջ հանրապետությունում մրգի ու բանջարեղենի գին թելադրել։ Այս մասին լրագրողներին ասաց ՀՀ գյուղատնտեսության նախարար Արթուր Խաչատրյանը։
«Նույնիսկ եթե «Երևան սիթին» կամ ցանկացած այլ խանութ ու ցանց ստիպված լինեն ավելի շատ հարկեր վճարել մրգի ու բանջարեղենի համար, չի նշանակում, որ ամբողջ հանրապետությունում դրանք կթանկանան։ Մրցակիցներ շատ կան։ Բացի այդ, կան նաև գյուղական շուկաներ, որոնք, ավանդույթի համաձայն, կբացվեն ամռան շրջանում», — ավելացրեց Խաչատրյանը։
«Մենք դրանք կվերաբացենք հունիսի 2-ից», — հայտնեց նախարարը։
Հիշեցնենք, որ ազգային անվտանգության ծառայությունը ստուգումներ է սկսել «Երևան սիթի» սուպերմարկետների ցանցում` պարզելու համար, թե հարկային ինչ խախտումներ են արվել միրգ ու բանջարեղենի վաճառքի ժամանակ։