ԵՐԵՎԱՆ, 30 մայիսի — Sputnik. Հայաստանի Ազգային անվտանգության ծառայության գործողություններն օրինական են։ Այդ մասին խորհրդարանում լրագրողներին ասաց Պետական եկամուտների կոմիտեի պետի առաջին տեղակալ Ռաֆիկ Մաշադյանը։
Մամուլում տարածված տեղեկությունների համաձայն` ԱԱԾ-ն ստուգումներ է անցկացնում «Երևան Սիթի» սոuպերմարկետների ցանցում։
«Իմ տեղեկություններով` տվյալ տնտեսվարողի մոտ ԱԱԾ գործողություններ են իրականացվում: ՊԵԿ-ից ոչ ոք այնտեղ չի այցելել։ Ստուգում են անհատ ձեռներեցներին, որոնք սուպերմարկետի տարածքում միրգ և բանջարեղեն են վաճառում»:
Նրա խոսքով` օրենքը դա չի արգելում, բայց արդյունքում բյուջե փող չի մտնում ոչ միայն «Երևան Սիթիից», այլ նաև մյուս առևտրի ցանցերից։
Ավելի վաղ սուպերմարկետները բողոքել են, որ բարդ է գյուղացիներից միրգ ու բանջարեղեն գնելը. նրանք ՀԴՄ կտրոնով չեն աշխատում, իրենք էլ ստիպված վճարում են երկու անգամ` իրենց և գյուղացի մատակարարների համար։ Ուստի հարկային մարմինը թույլ է տվել նրանց միրգ և բանջարեղեն վաճառել մասնավոր ձեռներեցների միջոցով` ոչ թե 20 տոկոս ԱԱՀ, այլ շրջանառության 5 տոկոս հարկ վճարելով։
Sputnik Արմենիայի հարցին, թե այդ մասնավոր ձեռներեցներն արդյո՞ք կապված են առևտրի ցանցերի հետ, Մաշադյանը հայտարարեց. «Դժվար է նման կապ հաստատելը»։
Նա նշեց, որ թույլտվությունը վերաբերել է միայն տեղի մրգին ու բանջարեղենին (որոնք գնում են գյուղացիներից), այլ ոչ թե ներկրվող բանանին, նարնջին։
Ամեն դեպքում, ԱԱՀ-ն պետք է ամբողջությամբ վճարվի, և հարկայինում կարծում են` թող բիզնեսը մտածի, թե այն ինչպես բաշխի շղթայում։