ԵՐԵՎԱՆ, 29 մայիսի — Sputnik, Լաուրա Սարգսյան. Քնեսեթի խոսնակ Յուլի Էդելշտեյնի` Հայոց ցեղասպանությունն ընդունելու մասին օրինագիծը խորհրդարանի գալիք նիստում չքննարկելու որոշումը լիովին բացատրելի է։ Sputnik Արմենիայի հետ զրույցում այս կարծիքը հայտնեց «Իսրայել-Հայաստան» միջազգային հասարակական ֆորումի համանախագահ, դոկտոր Ալեքսանդր Ցինկերը։
Նախօրեին հայտնի է դարձել, որ Էդելշտեյնը հետ է կանչել Հայոց ցեղասպանությունը ճանաչելու մասին օրինագիծը Քնեսեթի նիստի օրակարգից` անհարմար իրավիճակից խուսափելու համար։ Դա տեղի կունենար, եթե պատգամավորների մեծամասնությունը չաջակցեր օրենքի նախագծին։
Մայիսի 23-ին Իսրայելի խորհրդարանը 16 «կողմ» և 10 «դեմ» ձայներով հավանության է արժանացրել Հայոց ցեղասպանությունը պաշտոնապես ճանաչելու մասին հարցն օրակարգ մտցնելու առաջարկը։ Էդելշտեյնն այդ ժամանակ նշել է, որ Քնեսեթը պետք է ճանաչի Հայոց ցեղասպանությունը, նա նաև կոշտ է արտահայտվել քաղաքական այն գործիչների մասին, որ շահարկումներ են անում այդ թեմայով։
«Ես ի սկզբանե համոզված էի, որ օրինագիծը Քնեսեթի օրակարգ ներառելու հարցը որոշ ժամանակ կպահանջի, քանի որ ստորջրյա խութերը շատ են», — ասաց Ցինկերը։
Նա կարծում է, որ Էդելշտեյնը երկու տարբերակ է ունեցել։ Նախ` լինելով Հայոց ցեղասպանությունը ճանաչելու կողմնակից` կարող էր քվեարկության դնել օրինագիծը` միաժամանակ հասկանալով, որ հիմա դրա համար հարմար ժամանակ չէ։ Երկրորդ` նա կարող էր որոշում ընդունել շարունակել խորհրդարանական քննարկումները, արտաքին գործերի նախարարության հետ բանակցությունները, որպեսզի համոզված լինի հետագա աջակցության հարցում։
Փորձագետը համոզված է, որ Էդելշտեյնը ճիշտ է վարվել` ընտրելով երկրորդ տարբերակը, հատկապես որ թուրքական և ադրբեջանական լոբբիստական կառույցները փորձում են տապալել օրինագիծը։
Ավելի վաղ Թուրքիայի ԱԳՆ-ն հայտարարություն էր տարածել այն մասին, որ Հայոց ցեղասպանությունը ճանաչելու դեպքում Իսրայելը կվնասի ինքն իրեն։
Ցինկերի կարծիքով` Քնեսեթի խոսնակը պետք է վստահ լինի պատգամավորների մեծամասնության աջակցության հարցում։ Միայն այդ դեպքում նա կարող է հասնել դրական արդյունքի։
Եթե Էդելշտեյնը չցանկանար, որ օրինագիծն ընդունվեր, ապա այդ հարցի քննարկումը կդներ հենց հիմա` ոչ բավարար աջակցության պայմաններում։
«Եթե նա հարցը չի ընդգրկել օրակարգում, ուրեմն շահագրգռված է, որ փաստաթուղթն ընդունվի», — վստահեցրեց Ցինկերը։
Նրա խոսքով` օրինագիծը կարող են քննարկել մեկ շաբաթ կամ մի քանի ամիս անց։
Հիշեցնենք` նախորդ շաբաթ պատգամավոր Իցիկ Շմուլին («Սիոնական ճամբար») քննարկման է դրել Հայոց ցեղասպանության ճանաչման մասին օրինագիծը։ Հայտնի է, որ նման օրինագիծ էր պատրաստվում ներկայացնել Քնեսեթի պատգամավոր Ամիր Օհանան («Լիկուդ»)։ Հայ ժողովրդի ողբերգությունը ճանաչելու կոչ է արել նաև «Հրեական տուն» կուսակցության առաջնորդ, Իսրայելի կրթության նախարար Նաֆտալի Բենետն ու Իսրայելի տրանսպորտի և հետախուզության նախարար Իսրայել Կացը։