ՀՀ պետական վերահսկողության ծառայությունն առաջիկայում ստուգումներ կսկսի պետական բուհերում: Այս մասին այսօր Սարդարապատի հուշահամալիրում լրագրողներին ասաց ՀՀ պետական վերահսկողության ծառայության նորանշանակ պետ Դավիթ Սանասարյանը:
«Առաջիններից մեկը լինելու է Երևանի պետական համալսարանն ու պետական այլ բուհեր, բայց չեմ ասի, թե որն է լինելու առաջինը: Այս ամենը որոշելու ենք վարչապետ Նիկոլ Փաշինյանի հետ»,-ասաց նա։
Սանասարյանի խոսքով` քանի որ հեղափոխության ժամանակ շատ ակտիվ են եղել ուսանողները, նրանք առաջինը պիտի զգան հեղափոխության արդյունքները:
«Արվելու է ամեն ինչ, որ պետական համակարգի հիվանդ մարմիններն ուղղակի դուրս գան համակարգից»,- ասաց Սանասարյանը:
Իսկ թե ինչ սկանդալային բացահայտումներ են լինելու, և արդյոք պատասխանատվության կենթարկվեն բարձրաստիճան պաշտոնյաները, պարզ կլինի ավելի ուշ. Դավիթ Սանասարյանը խոստացավ այդ ամենի մասին խոսել առաջիկա ասուլիսի ժամանակ։