ԵՐԵՎԱՆ, 27 մայիսի — Sputnik. Ֆրանսիան մտադիր է առաջիկա ամիսներին ակտիվորեն աշխատել արցախյան հակամարտության կարգավորման ճանապարհներ փնտրելու ուղղությամբ։ Այս մասին հայտնել է Ֆրանսիայի արտգործնախարար Ժան-Իվ Լը Դրիանը Բաքվում իր ադրբեջանցի գործընկերոջ հետ ճեպազրույցի ժամանակ։ Այս մասին հայտնում է ՌԻԱ Նովոստին։
«Ստատուս քվոն հակամարտության լուծում չէ։ Մենք ուզում ենք, որ տարածաշրջանում խաղաղություն ու կայունություն լինի։ Հուսով եմ՝ առաջիկա ամիսներին այս հակամարտության կարգավորման առումով ակտիվ աշխատանք կսկսվի», — ասաց նա։
Ֆրանսիայի արտգործնախարարը հավելել է, որ Փարիզը պատրաստ է աջակցել արցախյան հիմնախնդրի կարգավորման ճանապարհներ փնտրելուն։
«Տարեվերջին Ֆրանսիայի նախագահը Ադրբեջան է այցելելու», — հայտնել է Լը Դրիանը Էլմար Մամեդյարովի հետ հանդիպումից հետո։
Նրա խոսքով՝ Ֆրանսիայի ու Ադրբեջանի նախագահները բանակցություններ կանցկացնեն նաև հուլիսի վերջին, Ադրբեջանի նախագահ Իլհամ Ալիևի Փարիզ այցի ընթացքում։