ԵՐԵՎԱՆ, 27 մայիսի — Sputnik. Թուրքիայի տարածքից Հայաստան է եկել հեռակառավարվող օդապարիկ։ Այս մասին Sputnik Արմենիային հայտնեց Արմավիրի մարզի Ամասիա գյուղի գյուղապետ Գարիկ Ավդալյանը, որտեղ հանգրվանել է օդապարիկը։
Նրա խոսքով` գյուղի տարածքում ընկած օդապարիկը հայտնաբերել են գյուղացիները և դրա մասին տեղյակ պահել իրեն։
Մամուլում առկա տեղեկությունները, թե օդապարիկի վրա տեսախցիկներ են տեղադրված, գյուղապետը ոչ հաստատեց, ոչ էլ հերքեց։
«Օդապարիկը փոքր չափերի է, կենդանու տեսքով մեծ փուչիկ է հիշեցնում։ Դրա վրա սարքավորում կա ամրացված, բայց իմ կարծիքով դա հեռակառավարման սարքավորում է, որով կառավարել են օդապարիկի թռիչքի ուղղությունը։ Երևի գազը վերջացել է, քամին բերել գցել է սահմանից այս կողմ»,– Sputnik Արմենիային ասաց Գարիկ Ավդալյանը` հավելելով, որ ինքը նաև տեսանկարահանել է «անկոչ հյուրին» և համաձայնեց մեզ տրամադրել իր նկարահանած տեսանյութը։
Գյուղապետը նաև հայտնեց, որ այս պահին գյուղի տարածքում են ոստիկանության ու ԱԱԾ ներկայացուցիչները, ովքեր, թերևս առաջիկայում կհայտնեն, թե ինչ նպատակով է հայ-թուրքական սահմանն անցել օդապարիկը։