ԵՐԵՎԱՆ, 27 մայիսի — Sputnik. ՀՀ նախագահ Արմեն Սարգսյանն ու աշխարհահռչակ երգիչ Էլթոն Ջոնն այսօր այցելել են «Երևան իմ սեր» հիմնադրամ, որտեղ հանդիպել են հիմնադրամի աջակցությամբ բուժվող երեխաներին։
Լրատվամիջոցների համար հանդիպումը փակ էր։ Մինչ այդ, պատասխանելով լրագրողների հարցերին, ՀՀ նախագահ Արմեն Սարգսյանն ասաց, որ Էլթոն Ջոնը բացառապես բարեգործական նպատակով է Հայաստանում։
«Շատ ավելի կարևոր է երեխաներին օգնելը։ Նա միայն այդ նպատակով է եկել` աջակցել երեխաներին ու բացահայտել Հայաստանը»,– ասաց նախագահը։
Հարցին, թե տեղյակ է արդյո՞ք երգիչը Հայաստանում տեղի ունեցած քաղաքական իրադարձություններին, Արմեն Սարգսյանը դրական պատասխան տվեց։
Նշենք, որ Արմեն Սարգսյանն ինքն էլ աջակցում է «Երևան իմ սեր» հիմնադրամին։
«Մենք պետք է մեր պատմությունից դասեր քաղենք, վերցնենք ինչ-որ բաներ և փորձենք փոփոխել դեպի լավը: Լինում է, որ փոփոխությունները լավի չեն բերում: Բայց չեմ կարծում, որ Հայաստանում նման բան կլինի: Կարծում եմ, որ «փոփոխության քամին» այստեղ է, և այն շատ դրական է»,- լրագրողների հետ զրույցում նշեց Էլթոն Ջոնը և ասաց, որ շատ երջանիկ է, որ հիմա Հայաստանում է և կարող է աջակցել երեխաներին:
Երեխաների հետ հանդիպմանը քիչ ուշացումով միացավ նաև ՀՀ ԱԺ նախագահ Արա Բաբլոյանը։
Հիշեցնենք, բրիտանացի երգիչը Հայաստան է ժամանել մայիսի 26-ին, ամերիկյան «Սթարկի» (Starkey) ընկերության նախաձեռնած բարեգործական ծրագրի շրջանակում: «Երևան իմ սեր» հիմնադրամում միջոցառումը կազմակերպել է հենց լսողական սարքեր արտադրող այս ընկերությունը։ Sputnik Արմենիայի տեղեկություններով` Էլթոն Ջոնն այս ընկերությունը ֆինանսավորողներից մեկն է։