ԵՐԵՎԱՆ, 25 մայիսի — Sputnik. Իսրայելն ինքն իրեն կվնասի, եթե ճանաչի Հայոց ցեղասպանությունը։ Թուրքական ԶԼՄ-ները հայտնում են, որ այս մասին հայտարարել է Թուրքիայի ԱԳՆ պաշտոնական ներկայացուցիչ Համի Աքսոյը։
Թուրքիայի արտգործնախարարության կարծիքով` Իսրայելի նման որոշումն իբր կարող է վնասել Հոլոքոստի հատուկ կարգավիճակը։
«Կարծում ենք` Իսրայելը, որը 1915 թվականի իրադարձությունները հավասարեցնում է Հոլոքոստին, առաջին հերթին իրեն է վնասում», — ընդգծել է Աքսոյը։
Մայիսի 23-ին Իսրայելի խորհրդարանը քննարկել է Հայոց ցեղասպանության ճանաչման հարցը։ Քննարկման նախաձեռնողը «Մերեց» կուսակցությունը ներկայացնող Թամար Զանդբերգն էր։
Պատգամավորները 16 «կողմ» և 10 «դեմ» քվեներով հավանության են արժանացրել Հայոց ցեղասպանության հարցը պաշտոնապես օրակարգ մտցնելու առաջարկը։ Քննարկման ընթացքում Քնեսեթի խոսնակ Յուլի Էդելշտեյնը նշել է, որ պետք է ճանաչել Հայոց ցեղասպանությունը։
ՀՀ արտգործնախարար Զոհրաբ Մնացականյանն իր հերթին այսօր հայտարարել է, որ Իսրայելի կողմից Հայոց ցեղասպանության ճանաչման հարցը նախևառաջ ներդրում է ցեղասպանությունների կանխման գործում։
«Դա հարց է, որը վերաբերում է ոչ միայն մեզ։ Այն դրված է ամբողջ մարդկության առաջ և կարևոր ազդանշան է ցեղասպանությունների կանխարգելման գործում», — ասել է արտգործնախարարը։
Մնացականյանը նշել է, որ նախարարությունը հետևում է Իսրայելի կողմից Օսմանյան կայսրությունում Հայոց ցեղասպանության ճանաչման գործընթացին։