ԵՐԵՎԱՆ, 24 մայիսի — Sputnik. Հայաստան-Իրան երկաթուղու կառուցումը ՀՀ կառավարության օրակարգում է։ Այս մասին այսօր լրագրողներին ասաց ՀՀ տրանսպորտի, կապի և ՏՏ նախարար Աշոտ Հակոբյանը։
Միաժամանակ նա ավելացրեց, որ մեծ ներդրումներ են պետք, ու տեսանելի ապագայում այդ նախագիծը դժվար թե իրականություն դառնա։
«Մենք այդ հարցը քննարկենք։ Ամեն ինչ կախված է դոնորների դիրքորոշումից, երկրների պատրաստվածությունից», — ասաց նախարարը։
ՀՀ կառավարությունը 2014 թ.-ի օգոստոսի 7-ին հավանություն է տվել Իրան-Հայաստան երկաթուղու շինարարության նախնական ծրագրին։ Նախագծի արժեքը գնահատվում է 3,5 մլրդ դոլար։ Երկաթուղու երկարությունը կկազմի 300 կիլոմետր։ Երկաթուղու ենթակառուցվածքում կներառվեն 19,4 կիլոմետր երկարությամբ 64 կամուրջ, 102,3 կիլոմետր երկարության 60 թունել և 27 կայան։
Երկաթուղու նախագիծը մշակել է Չինաստանի շինարարության և հաղորդակցությունների միջազգային ընկերությունը (CCCC International)։ Նախագծով հետաքրքրվում են չինական բանկերը, որոնք պատրաստակամություն են հայտնել ֆինանսավորել ծրագրի 60 տոկոսը։
Սակայն իրական ներդրողների բացակայության պատճառով կառուցումը մինչև հիմա հարցականի տակ է։