ԵՐԵՎԱՆ, 24 մայիսի — Sputnik. Ազովի հնագետներն այս տարի հայտնաբերել են միջնադարի դեկորատիվ–կիրառական արվեստի բացառիկ նմուշ, հաղորդում է Rostov.ru–ն։
Հազվագյուտ առարկան, որը գիտնականներն արդեն անվանում են «2018թ–ի առաջին սուպերգտածո», իրենից ներկայացնում է գավազանի վերևի մասը։
Գավազանի դետալը պատրաստված է եղջյուրից, դրա ծայրին կարելի է տեսնել սյուժետային կոմպոզիցիա։ Միջնադարյան վարպետը փորագրել է տեսարան` արծիվը սուր ճիրաններով պահում է իր զոհին` ինչ-որ թռչունի։
Գիտնականները հանգել են եզրակացության, որ աշխատանքը կատարել են պրոֆեսիոնալ արհեստավորները` ծավալային փորագրության տեխնիկայով։
«Դեկորատիվ արվեստում նման սյուժե բավական հազվադեպ է պատահում։ Ամենից հաճախ այն ներկայացված է միջնադարյան Հայաստանի քարափորագրական արվեստում», – ասել է Ազովի թանգարան–արգելոցի հնագիտության բաժնի վարիչ, պատմական գիտությունների թեկնածու Անդրեյ Մասլովսկին։
Նա հավելել է, որ հայկական սյուժենով նման գործեր հանդիպել են նաև Դաղստանի և Սուզդալի տարածքում։
Ազովի հնագետների համար միջնադարի դեկորատիվ–կիրառական արվեստի գլուխգործոց գտնելն իսկական սենսացիա է դարձել։
Շուտով նմուշն իր արժանի տեղ կզբաղեցնի Ազովի թանգարան–արգելոցում, և այն կարող են տեսնել բոլոր ցանկացողները։