ԵՐԵՎԱՆ, 24 մայիսի — Sputnik. Հայաստանում տեղադրված հակակարկտային հրթիռային համակարգերում առաջացած թերությունները շտկելու համար Հայաստան են ժամանել ռուսաստանցի մասնագետներ։ Հայտնում է ՀՀ ԱԻՆ–ը։
Նախարար Հրաչյա Ռոստոմյանն ընդունել է ռուսական «ԱՆՏԻԳՐԱԴ» ընկերության, Պոլիմերային նյութերի գիտահետազոտական ինստիտուտի և «Իրվիս» ընկերության առաջատար մասնագետներից կազմված պատվիրակությանը՝ ակադեմիկոս Մագոմեդ Աբաշևի գլխավորությամբ:
Հանդիպման ընթացքում քննարկվեցին հակակարկտային հրթիռային պաշտպանության պիլոտային ծրագրի շրջանակներում Արմավիրի և Արագածոտնի մարզերում տեղադրված հրթիռային կայանների ու հրթիռների փորձարկման ընթացքում հայտնաբերված ֆունկցիոնալ թերությունների շտկման և հետագայում դրանցից խուսափելու միջոցառումները:
Փորձնական կրակոցների ընթացքում արձանագրվել են 15-17% շեղումներ:
Ռուս գիտնականները ՀՀ ԱԻՆ աշխատակիցների համար նաև վերապատրաստման դասընթացներ են անցկացնելու։
Արմավիրի և Արագածոտնի մարզերում տեղակայվել է ժամանակակից հակակարկտային հրթիռային 3 կայան: