ԵՐԵՎԱՆ, 23 մայիսի — Sputnik. Կենդանիների փրկության միջազգային կազմակերպությունը (International Animal Rescue) դրամահավաք է կազմակերպել որբացած արջի քոթոթի համար։ Հաղորդագրության տեքստում գրված է, որ վերջերս Հայաստանում արջի քոթոթ են տեսել, որին շան նման ման էին տալիս փողոցներով։
«Շուտով մեզ հայտնի դարձավ, որ քաղաքացին արջի ձագին տանն էր պահում։ Մեր քննիչներն անմիջապես մեկնել են որոնումների և փրկել կենդանուն», — նշված է հաղորդագրության մեջ։
Տղամարդը պատմել է փրկարարներին, որ երբ գտել է կենդանուն, մայրը հետը չի եղել։
«Սակայն քիչ հավանական է, որ մայրը լքեր ձագին, ամենայն հավանականությամբ, նրան պարզապես սպանել են», — գրված է հոդվածում։
Արջուկը, որին Լեո են անվանել, օգնության կարիք է ունեցել։ Այժմ նրան հսկում են անասնաբույժները։ Վերականգնվելու համար երկար ժամանակ կպահանջվի, առաջիկա ամիսները նրա համար վճռական կլինեն։