ԵՐԵՎԱՆ, 22 մայիսի — Sputnik. «Ելք» խմբակցության նոր պատգամավոր Ալեն Սիմոնյանն ԱԺ-ում զբաղեցրեց Նիկոլ Փաշինյանի նախկին աթոռը: Այս հանգամանքը, նրա խոսքով, որևէ թաքնված իմաստ չունի, բայց պարտավորեցնող է:
«Շատ կարևոր տեղ է, խորհրդավոր իմաստ ունի ու շատ պարտավորեցնող է»,- ասաց Սիմոնյանը լրագրողների հետ զրույցում:
Այդուհանդերձ, խմբակցության նախկին ղեկավարի աթոռը զբաղցենելը, Ալեն Սիմոնյանի խոսքով, դեռ չի նշանակում, որ որոշված է, թե ով է զբաղեցնելու այդ պաշտոնը:
«Ո՞վ կփոխարինի Նիկոլ Փաշինյանին» հարցը «Ելք» խմբակցությունը քննարկելու է այսօրվա ընթացքում:
Խմբակցության նորեկներից Հայկ Կոնջորյանն էլ լրագրողների հետ զրույցում վստահեցրեց, որ ԱԺ է եկել նոր օրենսդրական գաղափարներով, որոնք առաջիկայում խմբակցության հետ քննարկելուց հետո կդառնան օրենսդրական նախաձեռնություններ:
Ինչ վերաբերում է խմբակցության ղեկավարի ընտրությանը, Կոնջորյանը ևս չցանկացավ գաղտնիքներ բացել:
«Վերջնական որոշում կլինի, կասենք»,- ասաց նա՝ արձագանքելով լրագրողների հարցին, թե որ քաղաքական ուժի ներկայացուցիչ է լինելու խմբակցության նոր ղեկավարը՝ «Լուսավոր Հայաստանից», թե «Ելքից»:
Հիշեցնենք` «Ելք» խմբակցության նախկին ղեկավար Նիկոլ Փաշինյանը մայիսի 8-ին ընտրվել էր ՀՀ վարչապետ: Խմբակցության ևս 3 պատգամավոր տեղափոխվել են գործադիր իշխանություն: