ԵՐԵՎԱՆ, 22 մայիսի — Sputnik. Հայաստանը չի կարող Իսրայելում ու դրա շուրջ տեղի ունեցող իրադարձություններին հետևել անտարբեր դիտորդի աչքերով։ Այս մասին լրագրողների հետ զրույցում ասաց ՀՀ ԱԳՆ մամուլի խոսնակ Տիգրան Բալայանը` նշելով, որ Հայաստանը մտադիր է նաև խորացնել Իրանի հետ հարաբերությունները։
«Իսրայելը մեզ համար եղբայրական երկիր է, մենք այնտեղ լուրջ պատմամշակութային ժառանգություն ունենք։ Հետևաբար, մենք չենք կարող անտարբեր դիտորդ լինել», — ասաց Բալայանը` խոսելով հայ-իսրայելական հարաբերությունների մասին։
Նա հիշեցրեց, որ 2017 թվականի նոյեմբերին նախկին արտգործնախարար Էդվարդ Նալբանդյանը Իսրայել էր այցելել։ Այցի ընթացքում երկկողմ հարաբերությունների խորացման մասին պայմանավորվածություն էր ձեռք բերվել։ Բալայանն ընդգծեց, որ այդ հռետորաբանությունն անփոփոխ է։
Նա նաև նշեց, որ Երևանը մտադիր է խորացնել հարաբերությունները Թեհրանի հետ։
«Հարևան Իրանը բարեկամական երկիր է, որի հետ Հայաստանը փոխշահավետ համագործակցություն է իրականացնում», — ասաց Բալայանը։
Բալայանի խոսքով` Երևանը շարունակելու է խորացնել այդ համագործակցությունը, ինչի մասին խոսվել է ՀՀ վարչապետ Նիկոլ Փաշինյանի ու Իրանի նախագահ Հասան Ռոհանիի հեռախոսազրույցի ժամանակ։