ԵՐԵՎԱՆ, 22 մայիսի — Sputnik. Ռուսաստանի առաջատար լրագրողներն ու մեդիամարզիչները հայ գործընկերներին կփոխանցեն իրենց փորձը և կպատմեն նյութեր ստեղծելու մասին, հայտնում է Հայաստանում գիտության և մշակույթի ռուսական կենտրոնի (ԳՄՌԿ) ներկայացուցչության մամուլի կենտրոնը։
«Իրական լրագրության դպրոց» միջազգային նախագիծը Հայաստանում կմեկնարկի հունիսի 14-ին և կտևի երկու օր։
«Կփորձենք երիտասարդ լրագրողներին սովորեցնել լիարժեք պատմություններ ստեղծել. այսօր քչերն են կարողանում անել դա, ինչն ամենապահանջված ժանրերից մեկն է», — նշել է «Ռուսկի ռեպորտյոր» ամսագրի գլխավոր խմբագիր Վիտալի Լեյբինը։
Իսկ ամսագրի գլխավոր տնօրեն Դմիտրի Միխայլինն ընդգծել է, որ սա մեկանգամյա միջոցառում չէ, այլ լրագրողների համար լրացուցիչ մասնագիտական կրթության ամբողջական համակարգ։
Նախկին ԽՍՀՄ երկրներից սեմինարներին մասնակցած լավագույն երիտասարդները 2018 թվականի նոյեմբերին կհրավիրվեն Մոսկվա` Ռուսաստանի առաջատար լրագրողների մասնակցությամբ մեկշաբաթյա ինտենսիվ թրեյնինգներ անցնելու համար։
Բացի այդ, հունիսի 16-ին Sputnik Արմենիա ՄՏԳ-ում կլոր սեղան կանցկացվի, որի ընթացքում Ռուսաստանից ժամանած լրագրողները հայ գործընկերների հետ կքննարկեն լրագրության ապագային վերաբերող հարցեր։