ԵՐԵՎԱՆ, 21 մայիսի — Sputnik. ԱԺ արտահերթ ընտրությունները կկազմակերպվեն հնարավորինս կարճ, բայց տրամաբանական ժամկետներում։ Այս մասին այսօր լրագրողների հետ զրույցում ասաց ՀՀ վարչապետ Նիկոլ Փաշինյանը։
«Կարևորը ոչ այնքան արտահերթ ընտրությունների ժամկետներն են, որքան դրանց որակը։ Մենք խնդիր ունենք ունենալ այնպիսի ընտրություններ, որոնք իսկապես ազատ են, իսկապես արդար են և իսկապես ժողովրդավարական»,- ասաց նա։
Իսկ դրա համար, ըստ Փաշինյանի, պետք է որոշակի երաշխիքներ ապահովվեն։ Արտահերթ ընտրությունների ժամկետն էլ կախված է հենց այդ երաշխիքներն ապահովելու ժամկետներից։
«Ցանկացած պահի, երբ մենք տեսնենք, որ պատրաստ ենք այդպիսի որակի ընտրությունների, մենք հանդես կգանք այդպիսի նախաձեռնությամբ»,-նշեց Փաշինյանը։
Փաշինյանը դժվարացավ ասել, թե գործադիր իշխանության եկած ուժը ինչ քաղաքական ուժով կգնա ընտրությունների և կպահպանվի արդյոք «Ելք» դաշինքը։