ԵՐԵՎԱՆ, 17 մայիսի — Sputnik. Կառավարության նիստից առաջ ՀՀ վարչապետ Նիկոլ Փաշինյանը դուրս եկավ շենքից և հանդիպեց շենքի առաջ հավաքված, իրենց բողոքն արտահայտող քաղաքացիներին։ Կառավարության շենքի մոտ էին խաղաղ պայմաններում զոհված զինծառայողների ծնողները, «Նաիրիտի» աշխատակիցները, վիրավոր զինծառայողներն ու նրանց ծնողները, արցախյան ազատամարտի մասնակիցները։
Նրանք իրենց հուզող տարբեր խնդիրները գրավոր ներկայացրեցին Նիկոլ Փաշինյանին։ Վարչապետն առանձին–առանձին մոտեցավ բոլորին, լսեց նրանց բողոքները, վերցրեց նամակներն, խոստացավ ուսումնասիրել և պատասխանել նրանց հուզող հարցերին։
Լրագրողների` քաղաքում չդադարող տարբեր բողոքի ակացիաների ու փակ փողոցների մասին հարցին ՀՀ վարչապետն ասաց, որ նորմալ է վերաբերվում նման երևույթներին։ «Դրանք կուտակված խնդիրներ են, որ մի օր պետք է դուրս գային ու իրենց լուծումը ստանային»,–ասաց նա։
Վարչապետի` ժողովրդի հետ հանդիպմանը ներկա էր նաև ՀՀ ոստիկանապետ Վալերիյ Օսիպյանը։
Համակարգում փոփոխությունների մասին լրագրողների հարցերին նա չցանկացավ պատասխանել։
Բողոքողների ու լրագրողների հետ զրույցից հետո, ՀՀ վարչապետը` աշխատակազմի ղեկավարի ուղեկցությամբ, շտապեց մասնակցելու կառավարության նիստին։