ԵՐԵՎԱՆ, 16 Մայիս — Sputnik. Երևանի «Հանրապետական» ստադիոնում այսօր կայացավ Ֆուտբոլի Հայաստանի գավաթի խաղարկության եզրափակիչը։ Պատվավոր մրցանակը վիճարկեցին Հայաստանի գործող չեմպիոն «Ալաշկերտը» և «Գանձասար–Կապանը»։
Հանդիպման ելքը վճռվեց 11 մետրանոց հարվածաշարով, որում ավելի դիպուկ գտնվեցին Կապանի թիմի ֆուտբոլիստները։ «Գանձասար–Կապանը» իր պատմության մեջ առաջին անգամ դարձավ ՀՀ գավաթակիր։
Հանդիպման հիմնական ժամանակի ընթացքում ավելի վտանգավոր էին «Գանձասար–Կապանի» գրոհները։ «Ալաշկերտն» էլ կարող էր հասնել հաջողության, բայց հիմնական ժամանակում դարպասի գրավում այդպես էլ չարձանագրվեց։
Նշանակված լրացուցիչ ժամանակի 1–ին խաղակեսի վերջնամասում Միհրան Մանասյանը առաջ մղեց «Ալաշկերտին»։ Բայց փոքրիկ ընդմիջումից հետո Լուբամբո Մուսոնդան խփեց պատասխան գնդակը։ Հաղթողը որոշվեց 11 մետրանոց հարվածաշարով։
«Գանձասար–Կապանի» կազմում վրիպեց Հայկ Իշխանյանը, իսկ Ալաշկերտի ֆուտբոլիստներ Դավիթ Մանոյանի և Տարոն Ոսկանյանի հարվածները հետ մղելով, «Գանձասար–Կապանի» դարպասապահ Գևորգ Կասպարովը հաղթանակ բերեց Կապանի թիմին։