ԵՐԵՎԱՆ, 15 մայիսի — Sputnik. Ռուսաստանը շեշտը դրել է Հայաստանի հետ տնտեսական համագործակցության ընդլայնման վրա, Sputnik Արմենիային ասաց քաղաքագետ Արթուր Աթաևը` մեկնաբանելով ՌԴ նախագահ Վլադիմիր Պուտինի և ՀՀ վարչապետ Նիկոլ Փաշինյանի ընդլայնված ձևաչափով հանդիպումը։
Նրա խոսքով` Ռուսաստանի և Հայաստանի հարաբերություններն արդեն կախված չեն նրանից, թե ով է գլխավորելու այդ երկու երկրները։
«Նույնիսկ եթե Փաշինյանի փոխարեն այլ մարդ լիներ, բարիդրացիական, տնտեսական հարաբերությունների մակարդակն այնպիսին է, որ հայ-ռուսական հանդիպման կոնտեքստը նույն մակարդակի վրա կլիներ», – ասաց Աթաևը։
Պուտինին այդքան էլ դուր չի գալիս իշխանության գալու Փաշինյանի մեթոդը։ Սակայն, քաղաքագետի կարծիքով, առաջնորդն առաջնորդ է մնում, հայերի ընտրության հետ պետք է հաշվի նստել, այդ թվում նաև` ամենաբարձր մակարդակով։
«Դա ցույց տվեց նաև Ռուսաստանի նախագահ Պուտինը», – ասաց Աթաևը։
Երկրորդը, ինչին պետք է ուշադրություն դարձնել, Աթաևի խոսքով` հանդիպման ձևաչափն է։ Պուտինին ամենամոտը նստած էր Անտոն Սիլուանովը, ապագա առաջին փոխվարչապետը, որը պատասխանատու է տնտեսական բլոկի համար։
Քաղաքագետի կարծիքով` այդ դասավորվածությունից դատելով` հիմքեր կան ասելու, որ շեշտը դրվելու է տնտեսական հարաբերությունները խորացնելու վրա։
«Եթե զարգանան տնտեսական հարաբերությունները, ապա դրանց կհետևի սոցիալ-մշակութային և քաղաքական դինամիկան», – ասաց Աթաևը։
Նա ուշադրություն դարձրեց, որ երկրորդը արտաքին քաղաքականության հարցերով օգնական Յուրի Ուշակովն էր նստած։
Փաշինյանի շուրթերից հնչած խոսքերը զբոսաշրջային խթանի մասին նույնպես վկայում են, որ նա դռներ է բացում ռուս զբոսաշրջիկների համար։ Հետևաբար, դա վերաբերում է նաև բիզնեսին ու քաղաքական գործիչներին։
«Բաց դռների քաղաքականությունը, որը հռչակվեց Սոչիում, հույս է ներշնչում ինձ։ Ես նրա հայտարարությունը ձևական չէի համար, նա անկեղծ քաղաքական գործիչ է և ասում է այն, ինչ մտածում է», – ընդգծեց Աթաևը։
Հիշեցնենք, որ ընդլայնված կազմով մայիսի 14–ին կայացած հանդիպման շրջանակներում ռուս առաջնորդը նշեց, որ Հայաստանը դիտարկում է որպես տարածաշրջանում մտերիմ գործընկեր և դաշնակից, և դա վերաբերում է ինչպես տնտեսական փոխգործակցությանը, այնպես էլ անվտանգության հարցերին։
Նա հույս հայտնեց, որ այն «լավ արդյունքները», որ վերջին շրջանում արձանագրել է Ռուսաստանի և Հայաստանի տնտեսական համագործակցությունը, կհաջողվի ոչ միայն պահպանել, այլև բազմապատկել։
Փաշինյանն իր հերթին վստահեցրեց, որ Ռուսաստանի հետ դաշնակցային հարաբերությունները կշարունակվեն։ Նրա խոսքով` երկու երկրները ունեն պոտենցիալ խթանելու և՛ քաղաքական, և՛ առևտրատնտեսական ոլորտները։ Նա նաև ուշադրություն հրավիրեց այն հանգամանքին, որ Հայաստանում բարձր են գնահատել Ռուսաստանի հավասարակշռված դիրքորոշումը ներքաղաքական ճգնաժամի ընթացքում։