ԵՐԵՎԱՆ, 15 մայիսի — Sputnik. «ԳեոՊրոՄայնինգ Գոլդ» ընկերության Արարատի ոսկու կորզման գործարանի և Արարատի ցեմենտի գործարանի աշխատակիցները բողոքի ակցիա են կազմակերպել։ Երկու դեպքում էլ պահանջը նույնն է` աշխատավարձի բարձրացում։
«ԳեոՊրոՄայնինգ Գոլդ» ընկերության աշխատակիցներից մեկը, որը չցանկացավ հրապարակել իր անունը, Sputnik Արմենիային խնդրեց չքաղաքականացնել իրենց գործադուլը։
«Մենք փոխզիջման հասանք ղեկավարության հետ. նրանք 30 տոկոսով կբարձրացնեն աշխատավարձերը։ Բայց մեր նպատակին հասնելու համար մեր նախաձեռնած ակցիան պետք չէ կապել երկրի ներքաղաքական իրավիճակի հետ»,- ասաց նա։
Ընկերության աշխատակցի խոսքով` ղեկավարությունն այլ դեպքում զիջման չէր գնա. անցյալ տարի նույնպես գործադուլից հետո են բարձրացրել աշխատավարձերը։
Այսօր ընկերությունում նվազագույն աշխատավարձը 114 հազար դրամ է, առավելագույնը` 200 հազար։
«Ղեկավարությունը երբեմն պարգևավճարներ էր տալիս, բայց այսօր այդ գումարով ընտանիք չես պահի»,- ասաց նա։
Եթե ղեկավարությունը կատարի աշխատակիցների պահանջը, ապա նվազագույն աշխատավարձը կկազմի 160 հազար դրամ։
Այս պահին ընկերության աշխատակիցները վերադարձել են իրենց պարտականությունների կատարմանը, մինչդեռ ցեմենտի գործարանում գործադուլը շարունակվում է։ Այստեղ նվազագույն աշխատավարձը 50-80 հազար դրամ է։ Բացի բարձրացումից, նրանք պահանջում են նաև մինչև մայիսի 20-ը վճարել ապրիլի աշխատավարձը։
Գործարանի տնօրեն Մանուկ Առաքելյանը մի քանիսին հրավիրել է իր աշխատասենյակ, որպեսզի քննարկեն այդ հարցերը։