ԵՐԵՎԱՆ, 14 Մայիս — Sputnik. ՀՀ նորանշանակ վարչապետ Նիկոլ Փաշինյանի հետ մարդիկ մեծ հույսեր են կապում, կարծես հրաշքի են սպասում` առանց առանձնակի մտածելու, որ նա կառավարման փորձ չունի, իր ռեպորտաժում պատմում է «Ռոսիա» հեռուստաալիքի թղթակից Դենիս Դավիդովը։
Երևանում բողոքի ցույցերը մարել են, բողոքի շարժման 42-ամյա առաջնորդ Նիկոլ Փաշինյանը վարչապետ է ընտրվել։ ՌԴ նախագահ Վլադիմիր Պուտինը վարչապետին շնորհավորական հեռագիր է հղել, իսկ ավելի ուշ հեռախոսազրույցի ժամանակ անձամբ շնորհավորել նրան։
Հաղորդման շրջանակներում թղթակից Դենիս Դավիդովը ցույց է տվել հասարակ գյուղացի Վիրաբի կյանքը, որը Արարատյան դաշտավայրում բերք է աճեցնում։ Տղամարդն ամեն օր մասնակցում էր ցույցերին և պնդում, որ պետության միակ աջակցությունը` վարկ վերցնելու կոչն էր։
«Ողջ հետխորհրդային տարածքից գործազրկության ամենաբարձր մակարդակն Հայաստանում է։ Գրեթե յուրաքանչյուր հինգերորդն աշխատանք չունի։ Կադրային գործակալությունների դռները թակում են ինչպես երեկվա ուսանողները, այնպես էլ փորձառու մասնագետները», – նշում է Դավիդովը։
Նրա խոսքով` Նիկոլ Փաշինյանի հետ հույսեր են կապում, սպասում հրաշքի` առանց մտածելու, որ նա բացարձակ կառավարման փորձ չունի։ Նա փորձառու ընդդիմադիր է, նշում է թղթակիցը։
Հաղորդման ընթացքում Դավիդովը զրուցել է նաև ՀՀ նորանշանակ ոստիկանապետ Վալերի Օսիպյանի հետ։
«Առաջին օրը չեմ ծառայում համակարգում, մոտ 30 տարի է։ Գիտեմ առկա բոլոր խնդիրները, արմատային խնդիրները։ Ուժերիս ներածին չափ կանեմ ամեն ինչ», – նշել է Օսիպյանը թղթակցի հետ զրույցում։
Ռեպորտաժի վերջում Դավիդովն ավելացրել է, որ նոր կառավարությունը մոտ 10 օր ունի ներկայացնելու իր ծրագիրը, որը պետք է ոչ միայն բոլորին ձեռնտու լինի, այլև աշխատի։